សេដ្ឋកិច្ច

សហគ្រាសកែច្នៃស្វាយចន្ទី ចាប់ដៃជាមួយកសិករ ជំរុញផលិតកម្មសរីរាង្គ

បានផុស

៦ ខែ មុន

នៅ

ថ្ងៃពុធ ២១ មករា ២០២៦

ដោយ

ក្រុមហ៊ុន Ample Agro Product Co., Ltd សហការជាមួយក្រុមហ៊ុន S’trei Corporation Co., Ltd បានចុះអនុស្សរណៈយោគយល់ (MoU) ជាមួយសហគមន៍កសិកម្មផលិតស្វាយចន្ទីសរីរាង្គ ខេត្តព្រះវិហារ ស្តីពី «កិច្ចសហការប្រតិបត្តិការគាំទ្រ និងជំរុញផលិតកម្មស្វាយចន្ទីសរីរាង្គ» ក្រោមការសម្របសម្រួលរបស់សហព័ន្ធស្វាយចន្ទីកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះ MoU នេះ មានគោលបំណងរួមគ្នាស្ថាបនាខ្សែសង្វាក់ផលិតកម្មស្វាយចន្ទីសរីរាង្គ ដែលមានស្តង់ដារ គុណភាព និងនិរន្តរភាព ដើម្បីលើកកម្ពស់ជីវភាពកសិករ និងការអភិវឌ្ឍវិស័យកសិកម្មសរីរាង្គនៅកម្ពុជា។

សហគមន៍កសិកម្មចន្ទីចំនួន ៥ សហគមន៍ ចូលរួម, មាន ៤ សហគមន៍មកពីស្រុករវៀង និង ១ សហគមន៍មកពីស្រុកជាំក្សាន្ត ខេត្តព្រះវិហារ។ សហគមន៍ទាំងនេះអាចផលិតស្វាយចន្ទីសរីរាង្គបានប្រមាណជាង ២០០ តោន ដែលមានតម្លៃតាមទីផ្សារជាក់ស្តែង។

ក្រុមហ៊ុន Ample Agro Product និង S’trei Corporation Co., Ltd នឹងផ្តល់ការគាំទ្រ ជំនួយបច្ចេកទេស និងហិរញ្ញវត្ថុ ដើម្បីជួយសហគមន៍ទទួលបានវិញ្ញាបនបត្រស្វាយចន្ទីសរីរាង្គ ព្រមទាំង ទទួលបញ្ជាទិញស្វាយចន្ទី ពី សហគមន៍ ដើម្បីយកទៅកែច្នៃ និងផ្គត់ផ្គង់ទៅទីផ្សារអន្តរជាតិ ជាពិសេសទីផ្សារអឺរ៉ុប (អាល្លឺម៉ង់) និងសហរដ្ឋអាមេរិក។

យោងតាមសមាគមស្វាយចន្ទីកម្ពុជា នៅក្នុងឆ្នាំ ២០២៥ កម្ពុជារកប្រាក់ចំណូលបាន ១,៥ ពាន់លានដុល្លារ ពីការនាំចេញគ្រាប់ស្វាយចន្ទីឆៅប្រមាណ ១ លានតោន កើនឡើង ២៧% ធៀបនឹងឆ្នាំ ២០២៤៕