លោកត្រាំ ប្រកាស​ច្បាស់ៗ​ថា ថៃជាអ្នកចាប់ផ្តើមសង្គ្រាមព្រំដែន​មុន​មក​លើ​កម្ពុជា

ប្រធានាធិបតី​អាមេរិក លោក ដូណាល់ ត្រាំ បាន​ប្រកាស​ថា ប្រទេសថៃគឺជាអ្នកដំបូង​ដែលបានចាប់ផ្តើមអរិភាពប្រឆាំងនឹងកម្ពុជា ដែល​បង្ក​ឲ្យ​មាន​ការប្រយុទ្ធគ្នានៅតាមព្រំដែនយ៉ាងសាហាវអស់រយៈពេលជាច្រើនសប្តាហ៍​កន្លង​មក​នេះ។ នេះ​បើ​យោង​តាម​​ការ​ចុះ​ផ្សាយ​របស់​ទីភ្នាក់ងារ​ព័ត៌មានរ៉យទ័រ។

នៅក្នុងកិច្ចសម្ភាសន៍ជាមួយអ្នកយកព័ត៌មាននៅឯភូមិគ្រឹះ Mar-a-Lago របស់លោកក្នុងរដ្ឋផ្លរីដា លោកត្រាំ បានចាត់ទុក​ជម្លោះនេះថាជាសង្គ្រាមមួយក្នុងចំណោមសង្គ្រាមចំនួន​៨ ដែល​រដ្ឋបាលរបស់លោកបានចូល​រួម​អន្តរាគមន៍។

មេ​ដឹក​នាំ​អាមេរិក​ បាន​ថ្លែង​ថា «ថៃកំពុងតែចាប់ផ្តើមធ្វើឲ្យប្រសើរឡើងវិញហើយ។ អ្នកដឹងទេ ពួកគេបានចាប់ផ្តើម(សង្គ្រាម)ជាមួយកម្ពុជា ពួកគេបានចាប់ផ្តើមវាឡើងវិញ។ ប៉ុន្តែខ្ញុំគិតថា… យើងកំពុងគ្រប់គ្រងបញ្ហានោះបានយ៉ាងល្អប្រសើរហើយ…»។ ការ​អត្ថាធិប្បាយ​របស់​លោក​ត្រាំ បាន​បញ្ជាក់​យ៉ាង​ច្បាស់​ថា ប្រទេស​ថៃ​គឺ​ជា​អ្នក​ឈ្លានពាន​​កម្ពុជាមុន។

សូម​ជម្រាប​ថា ការលើកឡើងរបស់លោកបានធ្វើឡើងនៅពេលដែលកម្ពុជា និងថៃ បានព្រមព្រៀងគ្នាក្នុងអំឡុងពេលកិច្ចប្រជុំពិសេសនៃរដ្ឋមន្ត្រីការបរទេសអាស៊ាននៅទីក្រុងកូឡាឡាំពួរ ដើម្បីកោះប្រជុំមន្ត្រីការពារជាតិនៅថ្ងៃទី២៤ខែធ្នូ ដើម្បីពិភាក្សាអំពីការអនុវត្ត និងការផ្ទៀងផ្ទាត់បទឈប់បាញ់។

ការវាយប្រហារគ្នាដែលឥឡូវនេះឈានចូលដល់សប្តាហ៍ទី៣ បានសម្លាប់មនុស្សយ៉ាងហោចណាស់៨០នាក់ ខណៈដែលភាគីទាំងពីរបាន​បន្ត​បាញ់កាំភ្លើងធំ រ៉ុក្កែត និងវាយប្រហារតាមអាកាសដាក់គ្នាទៅវិញទៅមក នៅតាមបណ្តោយព្រំដែនដែលមានជម្លោះជាយូរមកហើយ៕

ប្រែសម្រួល៖ ឈាង