ការ​លុប MoU ឆ្នាំ​២០០១ ស្ថិត​ក្នុង​សសរស្តម្ភសំខាន់ៗចំនួន​៥ សម្រាប់​​អាណត្តិ​ថ្មី​របស់​​អានុទីន

នៅក្នុងរបៀបវារៈដ៏ក្ដៅគគុកនាឱកាសបើកសម័យប្រជុំសភាដំបូង លោក អានុទីន ឆានវីរៈគុល នាយករដ្ឋមន្ត្រីថ្មីរបស់ថៃ បានដាក់ចេញនូវសសរស្តម្ភសំខាន់ៗចំនួន​៥ ដោយ​ក្នុង​នោះ​មាន​គោលនយោបាយអាទិភាពមួយដែលកំពុងទាក់ទាញការចាប់អារម្មណ៍យ៉ាងខ្លាំងពីមជ្ឈដ្ឋានជាតិ និងអន្តរជាតិ គឺការបង្គាប់ឲ្យមានការសិក្សាជាបន្ទាន់ ដើម្បីឈានទៅរកការបញ្ចប់អនុស្សរណៈនៃការយោគយល់គ្នា (MOU) ឆ្នាំ២០០១ រវាងថៃ និងកម្ពុជា ដែលពាក់ព័ន្ធនឹងតំបន់សមុទ្រទាមទារត្រួតគ្នា។

យោងតាមសេចក្តីថ្លែងការណ៍គោលនយោបាយដែលមានកម្រាស់២១ទំព័រ ចុះផ្សាយ​ដោយ​ Thairath ថ្ងៃទី​៩ខែមេសា​ឆ្នាំ​២០២៦ លោកអានុទីន បានកំណត់យកបញ្ហាដែនសមុទ្រនេះជាចំណុចយុទ្ធសាស្ត្រក្នុងផ្នែកកិច្ចការបរទេស និងសន្តិសុខជាតិ។ លោក​អានុទីន បានបញ្ជាក់យ៉ាងច្បាស់នៅក្នុងសភាថា រដ្ឋាភិបាលនឹងពន្លឿនការសិក្សាអំពីផលប៉ះពាល់ និងនីតិវិធីនៃការលុបចោល MOU នេះ​ឲ្យ​បានឆាប់រហ័សបំផុត ដើម្បីធានាបាននូវអត្ថប្រយោជន៍ខ្ពស់បំផុតសម្រាប់ជាតិ និងការពារបូរណភាពទឹកដីរបស់ថៃ។

ចំពោះផ្នែកសេដ្ឋកិច្ច រដ្ឋាភិបាលអានុទីន​មានបំណងជំរុញអាជីវកម្មខ្នាតតូច និងមធ្យម (SME) និងកែប្រែរចនាសម្ព័ន្ធសេដ្ឋកិច្ចឲ្យ​ស្របតាមយុគសម័យឌីជីថល។ វិស័យកសិកម្មនឹងត្រូវផ្លាស់ប្តូរទៅជាកសិកម្មឆ្លាតវៃ ចំណែកឯវិស័យទេសចរណ៍នឹងត្រូវលើកកម្ពស់ឲ្យ​ក្លាយជាគោលដៅចម្បងក្នុងតំបន់ ដោយផ្តោតលើគុណភាព និងតម្លៃខ្ពស់ជាជាងចំនួនភ្ញៀវ។ បន្ថែមពីនេះ ក្នុងផ្នែករដ្ឋបាលសាធារណៈ លោកអានុទីន បានជំរុញឲ្យ​មានការអភិវឌ្ឍរដ្ឋាភិបាលឌីជីថល ដែលអនុញ្ញាតឲ្យ​មន្ត្រីរាជការអាចធ្វើការពីទីណាក៏បាន។

លើសពីនេះ រដ្ឋាភិបាលថៃ​ក៏​ផ្ដោត​លើសុខុមាលភាពសង្គម ដោយសន្យាថានឹងផ្តល់ការអប់រំដោយឥតគិតថ្លៃពិតប្រាកដ និងកែលម្អប្រព័ន្ធធានារ៉ាប់រងសុខភាពជាតិឲ្យ​កាន់តែប្រសើរឡើងតាមរយៈបច្ចេកវិទ្យា AI។ ចំពោះបញ្ហាបរិស្ថាន ថៃមានគោលដៅកាត់បន្ថយការបំភាយឧស្ម័នផ្ទះកញ្ចក់ឲ្យ​នៅសូន្យត្រឹមឆ្នាំ២០៥០ និងរៀបចំប្រព័ន្ធធានារ៉ាប់រងគ្រោះមហន្តរាយជាតិជូនដល់គ្រប់ខ្នងផ្ទះប្រជាពលរដ្ឋ៕

​

ប្រែសម្រួល៖ ឈាង