ប្រធានាធិបតីកូរ៉េ មកដល់ទីក្រុងប៉េកាំង ត្រៀមជួបលោកស៊ី ផ្លូវការ

ប្រធានាធិបតីកូរ៉េខាងត្បូងលោក លី ជេម្យុង បានមកដល់ទីក្រុងប៉េកាំងនាថ្ងៃអាទិត្យទី៤មករា ដើម្បីចាប់ផ្តើមដំណើរទស្សនកិច្ចផ្លូវរដ្ឋរយៈពេល៤ថ្ងៃ និងចង់ជំរុញទំនាក់ទំនងសេដ្ឋកិច្ចជាមួយដៃគូពាណិជ្ជកម្មធំបំផុតរបស់សេអ៊ូល។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយព័ត៌មានរដ្ឋចិន CCTV នៅក្នុងថ្ងៃដដែលនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ប្រព័ន្ធផ្សព្វផ្សាយព័ត៌មានរដ្ឋចិន CCTV ថ្នាក់ដឹកនាំធុរកិច្ចកូរ៉េខាងត្បូងជាង ២០០នាក់ បានអមដំណើរលោក លី ជេម្យុង ដោយមានក្ដីសង្ឃឹមថា នឹងពិភាក្សាអំពីបញ្ហាដូចជា ការវិនិយោគខ្សែសង្វាក់ផ្គត់ផ្គង់ សេដ្ឋកិច្ចឌីជីថល និងការផ្លាស់ប្តូរវប្បធម៌ នៅក្នុងកិច្ចប្រជុំជាមួយប្រធានាធិបតី ស៊ី ជីនពីង និងមន្ត្រីជាន់ខ្ពស់ផ្សេងទៀត។

មិនតែប៉ុណ្ណោះ លោកលីក៏សង្ឃឹមថា នឹងអាចទាញយកឥទ្ធិពលរបស់ចិនលើកូរ៉េខាងជើង ដើម្បីគាំទ្រដល់ការប៉ុនប៉ងរបស់លោក ក្នុងការកែលម្អទំនាក់ទំនងជាមួយទីក្រុងព្យុងយ៉ាងផងដែរ។

យ៉ាងណាមិញ នៅក្នុងអំឡុងពេលដំណើរទស្សនកិច្ចនេះ គឺសម្រាប់កិច្ចប្រជុំលើកទីពីររបស់ពួកគេក្នុងរយៈពេលត្រឹមតែពីរខែប៉ុណ្ណោះ ដែលជាចន្លោះពេលខ្លីមិនធម្មតា ខណៈក្រុមអ្នកវិភាគថា ទាំងនេះគឺជាការបង្ហាញពីចំណាប់អារម្មណ៍យ៉ាងខ្លាំងរបស់ចិន ក្នុងការជំរុញកិច្ចសហប្រតិបត្តិការសេដ្ឋកិច្ច និងទេសចរណ៍។

ទោះជាយ៉ាងណា នាប៉ុន្មានម៉ោងមុនពេលលោក លី ចាកចេញទៅកាន់ទីក្រុងប៉េកាំង យោធាទីក្រុងសេអ៊ូលថា កូរ៉េខាងជើងបានបាញ់មីស៊ីលផ្លោងមួយគ្រាប់ចូលទៅក្នុងសមុទ្រជប៉ុន ដែលជាការសាកល្បងលើកដំបូងរបស់ខ្លួននៅដើមឆ្នាំ២០២៦ និងបន្ទាប់ពីសហរដ្ឋអាមេរិក វាយប្រហារប្រទេសវ៉េណេស៊ុយអេឡា ដែលធ្វើឲ្យភាពតានតឹងទូទាំងពិភពលោកកាន់តែឡើងកម្ដៅខ្លាំង។

សូមជម្រាបជូនថា ដំណើរទស្សនកិច្ចនេះ ជាដំណើរទស្សនកិច្ចលើកដំបូងរបស់លោក លី ជេម្យុង ទៅកាន់ប្រទេសចិន ចាប់តាំងពីចូលកាន់តំណែងក្នុងខែមិថុនា។ កូរ៉េខាងត្បូងបាននិយាយថា សន្តិភាពនៅលើឧបទ្វីបកូរ៉េ នឹងស្ថិតនៅក្នុងរបៀបវារៈក្នុងអំឡុងពេលដំណើរទស្សនកិច្ចមួយនេះ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កូរ៉េខាងជើង បាញ់មីស៊ីលផ្លោងច្រើនគ្រាប់ ចំពេលត្រាំចាប់ខ្លួនលោកម៉ាឌូរ៉ូ