រុស្ស៊ី ថា ប្រតិបត្តិការអាមេរិកនៅវ៉េណេស៊ុយអេឡា គឺខុសច្បាប់ ឯចិនថា អាមេរិក គំរាមកំហែងសន្តិភាពនៅ អាមេរិកឡាទីន

ប្រតិបត្តិការរបស់អាមេរិកនៅវ៉េណេស៊ុយអេឡា ត្រូវរងការរិះគន់ពីសំណាក់ប្រទេសមួយចំនួន ដោយក្នុងនោះសម្ព័ន្ធមិត្តរបស់រដ្ឋាភិបាលទីក្រុងការ៉ាកាស គឺចិននិងរុស្ស៊ី ក៏ប្រតិកម្មខ្លាំងៗផងដែរ។

អនុប្រធានក្រុមប្រឹក្សាសន្តិសុខរុស្ស៊ីលោក Dmitry Medvedev បានបន្ទោសថា ប្រតិបត្តិការយោធាអាមេរិកនៅវ៉េណេស៊ុយអេឡា គឺជាទង្វើខុសច្បាប់និងបង្កអស្ថិរភាព។

ក្នុងបទសម្ភាសជាមួយសារព័ត៌មាន TASS កាលពីថ្ងៃអាទិត្យទី៤ខែមករាឆ្នាំ២០២៦ លោក ​Medvedev ថ្លែងថា៖ «ប្រធានាធិបតីវ៉េណេស៊ុយអេឡា និយាយហើយនិយាយទៀតថា គោលបំណងពិតប្រាកដនៃរដ្ឋបាលសហរដ្ឋអាមេរិកបច្ចុប្បន្ន គឺដើម្បីដណ្តើមយកប្រេងកាត និងឥន្ធនៈផូស៊ីលរបស់វ៉េណេស៊ុយអេឡា ហើយប្រធានាធិបតី ដូណាល់ ត្រាំ ក៏មិនបានលាក់បាំងរឿងនោះដែរ។ ការឆ្មក់វាយប្រហាររបស់សហរដ្ឋអាមេរិកមកលើវ៉េណេស៊ុយអេឡា ដើម្បីចាប់ខ្លួនប្រធានាធិបតី នីកូឡាស ម៉ាឌូរ៉ូ និងភរិយា លោកស្រី ស៊ីលីយ៉ា ផ្លូរ៉េស គឺជាការរំលោភលើច្បាប់អន្តរជាតិ។

ស្របពេលជាមួយគ្នានោះ ក្រសួងការបរទេសចិនលើកឡើងថា ការប្រើប្រាស់កម្លាំងបាយរបស់សហរដ្ឋអាមេរិក កំពុងគំរាមកំហែងដល់សន្តិភាពនៅក្នុងតំបន់អាមេរិកឡាទីន ហើយទីក្រុងប៉េកាំង ប្រកាសគាំទ្រដល់ការរៀបចំកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ (UNSC)។

អ្នកនាំពាក្យក្រសួងការបរទេស លោក Lin Jian បានបញ្ជាក់ជាថ្មីនូវជំហររបស់ទីក្រុងប៉េកាំង ចំពោះការវាយប្រហាររបស់សហរដ្ឋអាមេរិកលើប្រទេសវ៉េណេស៊ុយអេឡា។

លោកនិយាយថា រដ្ឋាភិបាលចិនបានរក្សាទំនាក់ទំនង និងកិច្ចសហប្រតិបត្តិការប្រកបដោយភាពវិជ្ជមានជាមួយរដ្ឋាភិបាលវ៉េណេស៊ុយអេឡា។ ទោះបីជាស្ថានភាពអន្តរជាតិប្រែប្រួលយ៉ាងណាក៏ដោយ ក៏ ចិននៅតែជាមិត្តល្អជាមួយបណ្តាប្រទេសនៅអាមេរិកឡាទីនជានិច្ច។

សូមជម្រាបជាថ្មី អាមេរិកបានបើកប្រតិបត្តិការយោធាពិសេស «Operation Absolute Resolve» នៅវ៉េណេស៊ុយអេឡា ដើម្បីចាប់ខ្លួនលោក ម៉ាឌូរ៉ូ និងភរិយាទាំងកណ្តាលអធ្រាត្រថ្ងៃសៅរ៍ទី៣ខែមករាឆ្នាំ២០២៦ ដោយចោទជា ប្រធានាធិបតីរូបនេះ ជាមេគ្រឿងញៀននិងនៅពីក្រោយក្រុមភេរវករដែលគំរាមកំហែងខ្លាំងដល់សហរដ្ឋអាមេរិក៕

អត្ថបទ៖ សុខ សុវណ្ណ