ប៉ាណាម៉ា ត្រូវ​ក្រុមហ៊ុន​ហុងកុងប្ដឹង ក្រោយ​បញ្ចប់​កិច្ចសន្យា​កំពង់ផែ​ចំនួន​២

ក្រុមហ៊ុន​ហុងកុង CK Hutchison បានចាប់ផ្តើមកិច្ចដំណើរការមជ្ឈត្តកម្មអន្តរជាតិប្រឆាំងនឹងប្រទេសប៉ាណាម៉ា ដែលជាការបង្កើនភាពតានតឹងក្នុងវិវាទកម្រិតខ្ពស់ ជុំវិញការបញ្ចប់កិច្ចសន្យាប្រតិបត្តិការកំពង់ផែយុទ្ធសាស្ត្រចំនួនពីរនៅព្រែកជីកប៉ាណាម៉ា។

យោង​តាម​ Al Jazeera ចំណាត់ការនេះត្រូវបានប្រកាស​នា​ថ្ងៃពុធ​ទី​៤​ខែ​កុម្ភៈ​ឆ្នាំ​២០២៦ បន្ទាប់ពីសាលដីកាជាប្រវត្តិសាស្ត្ររបស់តុលាការកំពូលប៉ាណាម៉ា បានសម្រេចទុកជាមោឃៈនូវសិទ្ធិសម្បទានរបស់ក្រុមហ៊ុនបុត្រសម្ព័ន្ធ Panama Ports ដោយប្រកាសថាវាផ្ទុយនឹងរដ្ឋធម្មនុញ្ញ។ ការសម្រេចនេះ បានទាក់ទាញការឆ្លើយតបយ៉ាងខ្លាំងក្លាពីទីក្រុងប៉េកាំង ដោយការិយាល័យកិច្ចការហុងកុង និងម៉ាកាវ (HKMAO) បានហៅសាលក្រមនេះថាជាភាព «មិនសមហេតុផល» និង «គួរ​​ឲ្យអាម៉ាស់» ព្រមទាំងបានព្រមានថា ប៉ាណាម៉ានឹងត្រូវសង «តម្លៃយ៉ាងធ្ងន់ធ្ងរ» ទាំងខាងនយោបាយ និងសេដ្ឋកិច្ច ចំពោះការចុះចូលនឹងសម្ពាធពីបរទេស។

សមរភូមិគតិយុត្តនេះ បានក្លាយជាចំណុចក្តៅនៅក្នុងការប្រជែងគ្នាកាន់តែខ្លាំងឡើងរវាងទីក្រុងវ៉ាស៊ីនតោន និងទីក្រុងប៉េកាំង។ ប្រធានាធិបតីអាមេរិក ដូណាល់ ត្រាំ បានលើកឡើងដដែលៗថា ប្រតិបត្តិការដែលមានទំនាក់ទំនងជាមួយចិននៅក្បែរព្រែកជីក គឺជាការគំរាមកំហែងដល់សន្តិសុខជាតិ ដោយមានពេលខ្លះលោកបានគំរាមដណ្តើមយកការគ្រប់គ្រងផ្លូវទឹកនេះមកវិញថែមទៀត។

ខណៈដែលសមាជិកសភាអាមេរិកបានអបអរសាទរចំពោះការសម្រេចរបស់តុលាការថាជា «ជ័យជម្នះសម្រាប់អាមេរិក» ចិនបានចោទប្រកាន់​ក្រុង​វ៉ាស៊ីនតោន​ថាបានប្រើប្រាស់ «យុទ្ធសាស្ត្រគំរាមកំហែង» ដើម្បីបង្ខំប៉ាណាម៉ាឲ្យធ្វើតាមខ្លួន។ ក្នុងពេលដែលក្រុមហ៊ុនដឹកជញ្ជូនយក្សរបស់ដាណឺម៉ាក Maersk កំពុងរៀបចំចូលកាន់កាប់កំពង់ផែ Balboa និង Cristobal ជាបណ្តោះអាសន្ន ផលវិបាកនេះកំពុងគំរាមកំហែងដល់ផែនការលក់ទ្រព្យសម្បត្តិកំពង់ផែសកលតម្លៃ ២៣​ពាន់លានដុល្លាររបស់ CK Hutchison និងធ្វើ​ឲ្យ​អនាគតនៃសរសៃឈាមពាណិជ្ជកម្មដ៏សំខាន់បំផុតមួយរបស់ពិភពលោកស្ថិតក្នុងភាពមិនច្បាស់លាស់នៃភូមិសាស្ត្រនយោបាយ៕

ប្រែសម្រួល៖ ឈាង