​អ៊ីរ៉ង់​​បង្កើន​ការ​វាយ​ប្រហារ​​​អាកាសយានដ្ឋាន និង​​​បិទ​ច្រកសមុទ្រ បង្កើន​សម្ពាធ​​លើ​អាមេរិកឲ្យបញ្ឈប់សង្គ្រាម

អ៊ីរ៉ង់បានកំណត់គោលដៅលើមជ្ឈមណ្ឌលតភ្ជាប់សកលនៃប្រទេសជិតខាង​ក្នុង​តំបន់​ឈូងសមុទ្រ​ពែក្សរ៍​ ដោយធ្វើឲ្យប្រតិបត្តិការ​តាម​ផ្លូវ​អាកាសចរណ៍នៅក្នុងតំបន់ទាំំងនោះជាប់គាំង ហើយភាគច្រើនពឹងផ្អែកលើវិស័យ​អាកាសចរណ៍ជាសរសៃឈាម​នៃ​​សេដ្ឋកិច្ច។ ជាក់ស្ដែង ប្រទេសទាំងនោះប្រើប្រាស់អាកាសយានដ្ឋានសម្រាប់ការនាំចូលអាហារ និងនាំកម្លាំងពលកម្មសំខាន់គឺជនបរទេសត្រឡប់មក​ចូល​ប្រទេស​​វិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍ពីទីភ្នាក់ងារ Reuters អាកាសយានដ្ឋានក៏ជាចំណុចតភ្ជាប់ដ៏សំខាន់សម្រាប់ការដឹកជញ្ជូន និងទំនិញសកលផងដែរ។ យោងតាមសេវាកម្មតាមដានជើងហោះហើរ Flightradar24 ជើងហោះហើរជាង ៣,៤០០ ត្រូវបានលុបចោល​ភ្លាម​ៗ​កាលពីថ្ងៃទី១ខែមីនា នៅឯអាកាសយានដ្ឋានចំនួន ៧នៅមជ្ឈិមបូព៌ា។ ​

​តួលេខ​​នៃ​ការ​លុប​ចោល​ជើង​ហោះ​ហើរ​​បាន​ឈានដល់​ជិត​១ម៉ឺន​​ គិត​ត្រឹមថ្ងៃទី​​៣ខែ​​មីនា​​។​

រហូតមកដល់ពេលនេះ អ៊ីរ៉ង់បានវាយប្រហារអាកាសយានដ្ឋាននៅទីក្រុងឌូបៃ និងអាប៊ូដាប៊ី ដែលជាមជ្ឈមណ្ឌលប្រតិបត្តិការ​ដ៏​មមាញឹក​បំផុត​​របស់ក្រុមហ៊ុនអាកាសចរណ៍ Emirates និង Etihad នៅអារ៉ាប់រួម ក៏ដូចជាអាកាសយានដ្ឋានផ្សេងទៀតនៅក្នុងប្រទេសគុយវ៉ែត និងបារ៉ែន។ ជាក់ស្ដែង កាលពីព្រឹកថ្ងៃទី១មីនា បន្ទាប់ពីការវាយប្រហារដោយយន្ត​ហោះ​គ្មានមនុស្សបើករបស់អ៊ីរ៉ង់ លើអាកាសយានដ្ឋានអន្តរជាតិឌូបៃ ជើងហោះហើរទាំងអស់ត្រូវបានផ្អាក រហូតដល់មានការជូនដំណឹងបន្ថែម។

មិនតែប៉ុណ្ណោះ អ៊ីរ៉ង់ក៏កំពុងកំណត់គោលដៅកំពង់ផែសមុទ្រ និងហេដ្ឋារចនាសម្ព័ន្ធសំខាន់ៗផ្សេងទៀតផងដែរ។

យន្តហោះគ្មានមនុស្សបើកបានវាយប្រហារសណ្ឋាគារខ្ពស់ៗ និងអគារផ្សេងៗទៀតនៅទីក្រុងឌូបៃ និងអគារអាផាតមិននៅប្រទេសបារ៉ែន។ ការព្រមាន​របស់អ៊ីរ៉ង់ ក៏បានរារាំងច្រកសមុទ្រហ័រមូស (Hormuz) ដែលជាច្រករបៀង​នាំចេញ​​ប្រេងដ៏សំខាន់បំផុត​ទៅ​​កាន់​​ពិភពលោក ដោយបង្ហាញថា ការសងសឹករបស់ទីក្រុងតេហេរ៉ង់ កំពុងចាប់ផ្តើមមានឥទ្ធិពលលើពិភពលោក។

បើតាមសម្តីរបស់លោកស្រី Yasmine Farouk នាយិកា​គម្រោងឈូងសមុទ្រ និងឧបទ្វីបអារ៉ាប់នៅអង្គការ International Crisis Group (ICG) បានលើកឡើងថា យុទ្ធសាស្ត្ររបស់អ៊ីរ៉ង់ មិនត្រឹមតែធ្វើឲ្យជម្លោះនេះក្លាយជា​វិបត្តិ​ក្នុង​​តំបន់ប៉ុណ្ណោះទេ ប៉ុន្តែថែមទាំងធ្វើឲ្យវាក្លាយ​វិបត្តិ​កម្រិត​​អន្តរជាតិ តាមរយៈ​ការ​ទាញ​​បណ្តាប្រទេសឈូងសមុទ្រ​​ឲ្យ​ពាក់​ព័ន្ធ​​​​តាំងពីដើម​ដំបូង​​។

អ្នកវិភាគសន្តិសុខម្នាក់ទៀត ក៏បាននិយាយថា ការវាយប្រហារបច្ចុប្បន្នរបស់អ៊ីរ៉ង់ មានគោលបំណងបង្កើនសម្ពាធលើអាមេរិក ដោយបង្ខំឲ្យបណ្តាប្រទេសឈូងសមុទ្រអំពាវនាវអាមេរិក​បញ្ឈប់​ការវាយប្រហារ។ ការវាយប្រហារទាំងនេះបានជំរុញឲ្យតម្លៃប្រេងឡើងថ្លៃ ដែលបង្កើនការព្រួយបារម្ភអំពីការកើនឡើងនៃតម្លៃថាមពលសកល និងអតិផរណា។

សរុបជារួមមក ការវាយប្រហារលើអាកាសយានដ្ឋាន កំពង់ផែ និងហេដ្ឋារចនាសម្ព័ន្ធសំខាន់ៗផ្សេងទៀតបានបង្ហាញឲ្យដឹងថា ប្រទេសអ៊ីរ៉ង់កំពុងកំណត់គោលដៅលើការលំបាកផ្នែកសេដ្ឋកិច្ចនៅនៅមជ្ឈិមបូព៌ា ដើម្បីដាក់សម្ពាធលើសហរដ្ឋអាមេរិក និងអ៊ីស្រាអែល៕

អត្ថបទ៖ សាង ស្រីល័ក្ខ