ចិនតាំង​នាម​ខ្លួនជា «បង្គោលគ្រឹះនៃស្ថិរភាព» ចំពេល​សង្គ្រាមនៅអ៊ីរ៉ង់កំពុង​ឆាបឆេះ

រដ្ឋមន្ត្រីការបរទេស លោក Wang Yi បានបង្ហាញរូបភាពប្រទេសចិនជាអ្នកការពារសន្តិភាព និងស្ថិរភាពក្នុងអំឡុងពេលសង្គ្រាមនៅអ៊ីរ៉ង់កំពុងឆាបឆេះ និងមុនជំនួបកំពូលរវាងមេដឹកនាំចិន-អាមេរិកនាពេលឆាប់ៗខាងមុខ។

ចេញ​ផ្សាយ​នា​ថ្ងៃទី​៨​ខែ​មីនា​ឆ្នាំ​២០២៦ សារព័ត៌មាន CNN បាន​ឲ្យ​ដឹង​ថា លោក Wang បាន​និយាយ​ថា សង្គ្រាមអាមេរិក-អ៊ីរ៉ង់ «មិនគួរកើតមានឡើងទាល់តែសោះ» ហើយលោកបានអំពាវនាវឲ្យមានការឈប់បាញ់ជាបន្ទាន់ ដើម្បីទប់ស្កាត់កុំ​ឲ្យ​​ភ្លើងសង្គ្រាមរីករាលដាល។ លោកបានបញ្ជាក់ថា ចិនគឺជា «ប្រភពនៃស្ថិរភាព និងភាពប្រាកដប្រជាដ៏មានតម្លៃបំផុតសម្រាប់ពិភពលោកដ៏ច្របូកច្របល់» ដែលផ្ទុយស្រឡះ​ពីសហរដ្ឋអាមេរិក។

ការបង្ហាញជំហរនេះធ្វើឡើងខណៈពេលដែលលោក ស៊ី ជីនពីង ត្រៀមទទួលស្វាគមន៍លោក ដូណាល់ ត្រាំ ក្នុងទីក្រុងប៉េកាំងសម្រាប់ការចរចាដ៏សំខាន់នៅចុងខែនេះ។ លោក Wang Yi បាន​ស្វាគមន៍ចំពោះជំនួបកំពូលនេះ ដោយជំរុញ​ឲ្យភាគីទាំងពីរដោះស្រាយ​នូវ​បញ្ហា​ខ្វែង​គំនិត​គ្នា។ យ៉ាង​ណា​មិញ ទន្ទឹមនឹងនេះ លោក Wang ក៏បានរិះគន់ដោយប្រយោលចំពោះការព្យាយាមបង្កើតប្រព័ន្ធយុត្តិធម៌ថ្មីក្រៅអង្គការសហប្រជាជាតិ និងបានបញ្ជាក់ថា ទំនាក់ទំនងចិន-រុស្ស៊ី នៅតែ «រឹងមាំដូចភ្នំ»។

បន្ថែម​ពី​នេះ មន្ត្រីការបរទេសជាន់ខ្ពស់រូបនេះបានកត់សម្គាល់ពីជោគជ័យរបស់ចិនក្នុងការទាក់ទាញសម្ព័ន្ធមិត្តអាមេរិក រួមមាន បារាំង អង់គ្លេស និងអាល្លឺម៉ង់ ដែលបានមកបំពេញទស្សនកិច្ចនៅទីក្រុងប៉េកាំងនាពេលថ្មីៗ។ លោកបានសង្កត់ធ្ងន់ថា ចិនមិនមែនជាគូប្រជែងឡើយ ប៉ុន្តែជាដៃគូសកល។ ទោះជាយ៉ាងណា ក្នុងសន្និសីទកាសែតនេះ លោក Wang មិនបានលើកឡើងអំពីបញ្ហាសមុទ្រចិនខាងត្បូង សង្គ្រាមនៅអ៊ុយក្រែន ឬសម្ពាធយោធាលើកោះតៃវ៉ាន់ ដែលកំពុងធ្វើ​ឲ្យប្រទេសជិតខាងមានការព្រួយបារម្ភនោះទេ៕

ប្រែសម្រួល៖ ឈាង