តារាចម្រៀងវ័យក្មេង រ៉ន ណាវី មរណភាពព្រោះគ្រោះថ្នាក់ចរាចរណ៍

ដំណឹងដ៏ក្រៀមក្រំបានធ្វើឱ្យអ្នកសិល្បៈ និងមហាជនមានការសោកស្តាយយ៉ាងខ្លាំង ខណៈតារាចម្រៀងវ័យក្មេង រ៉ន ណាវី ដែលត្រូវជាប្អូនស្រីបង្កើតរបស់តារាចម្រៀង រ៉ន ចាន់ឌីន បានទទួលមរណភាពហើយ នៅព្រឹកថ្ងៃទី១៨ ខែមីនា ឆ្នាំ២០២៦ បន្ទាប់ពីជួបគ្រោះថ្នាក់ចរាចរណ៍ និងត្រូវបានបញ្ជូនសង្គ្រោះបន្ទាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពី អុឹម ជីវ៉ា បានឱ្យដឹងថា តារាចម្រៀងវ័យក្មេងរូបនេះ បានទទួលមរណភាពក្រោយពេលជួបគ្រោះថ្នាក់ចរាចរណ៍បានត្រឹមមួយថ្ងៃប៉ុណ្ណោះ។ ប្រភពដដែលបានបន្តថា ព័ត៌មាននេះត្រូវបានបញ្ជាក់ពីសមាជិកគ្រួសារ នៅថ្ងៃទី១៨ ខែមីនា ឆ្នាំ២០២៦។

មរណភាពរបស់ រ៉ន ណាវី បានបង្កឱ្យមានការភ្ញាក់ផ្អើល និងសោកស្តាយយ៉ាងខ្លាំង ព្រោះខ្លួនជាតារាចម្រៀងវ័យក្មេងដែលមានសមត្ថភាព និងសំឡេងពីរោះ គួរឱ្យចាប់អារម្មណ៍។ ក្រុមគ្រួសាររបស់ខ្លួនកំពុងស្ថិតក្នុងភាពទុក្ខសោកយ៉ាងធ្ងន់ធ្ងរ បន្ទាប់ពីបាត់បង់សមាជិកជាទីស្រឡាញ់មួយរូបក្នុងរយៈពេលដ៏ឆាប់រហ័ស។

ការបាត់បង់នេះក៏ត្រូវបានចាត់ទុកថា ជាការបាត់បង់ធនធានមនុស្សដ៏មានតម្លៃមួយសម្រាប់វិស័យសិល្បៈខ្មែរ ខណៈមិត្តរួមអាជីព និងអ្នកគាំទ្រជាច្រើន កំពុងបង្ហាញការចូលរួមរំលែកទុក្ខ និងអនុស្សាវរីយ៍ជាមួយគ្រួសាររបស់ខ្លួនផងដែរ៕ ដោយ៖ ចាន់រ៉ា