សាកលវិទ្យាល័យជុងវ៉ុន ឯកភាពនឹងសំណើក្នុងការបន្ថែមចំនួនអាហារូបករណ៍សម្រាប់និស្សិតកម្ពុជា

លោក JANG Kiwon សាកលវិទ្យាធិការនៃសាកលវិទ្យាល័យជុងវ៉ុន នៃប្រទេសកូរ៉េខាងត្បូង បានឯកភាពចំពោះសំណើរបស់ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ ក្នុងការបន្ថែមចំនួនអាហារូបករណ៍សម្រាប់និស្សិតកម្ពុជា ដើម្បីពង្រឹងវិស័យអប់រំ និងកិច្ចសហប្រតិបត្តិការប្រទេសទាំងពីរ។  

ការណ៍នេះ ធ្វើឡើងនៅថ្ងៃទី ២៣ ខែមីនា ឆ្នាំ២០២៦ ក្នុងឱកាស លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានទទួលជួបសម្តែងការគួរសម និងសំណេះសំណាលការងារជាមួយក្រុមគណៈប្រតិភូនៃសាកលវិទ្យាល័យជុងវ៉ុន (Jungwon University) ដឹកនាំដោយលោក JANG Kiwon សាកលវិទ្យាធិការនៃសាកលវិទ្យាល័យជុងវ៉ុន នៅស្ថានទូតកម្ពុជាក្នុងទីក្រុងសេអ៊ូល។

ក្នុងជំនួបនោះ ឯកអគ្គរាជទូតកម្ពុជាប្រចាំកូរ៉េខាងត្បូង បានគូសបញ្ជាក់អំពីសារៈសំខាន់នៃវិស័យអប់រំសម្រាប់ប្រទេសកម្ពុជា ដែលប្រទេសកម្ពុជាបានយកប្រទេសកូរ៉េជាគំរូក្នុងការអភិវឌ្ឍ ពិសេសការអប់រំ ដែលវាជាវិស័យគន្លឹះក្នុងការផ្សារភ្ជាប់ទំនាក់ទំនងប្រជាជន និងប្រជាជន។ លោក ក៏បានថ្លែងអំណរគុណចំពោះសាកលវិទ្យាល័យដែលបានផ្តល់អាហារូបករណ៍ដល់និស្សិតកម្ពុជា ហើយលោក ក៏បានស្នើទៅកាន់ លោក JANG ពិចារណារផ្តល់ចំនួនអាហារូបករណ៍បន្ថែមទៀតដល់និស្សិតកម្ពុជាលើវគ្គជំនាញ វគ្គបណ្តុះបណ្តាលវិជ្ជាជីវៈ និងវគ្គសិក្សាខ្លីជាដើម។

ឆ្លងតបនេងសំណើនេះ លោក JANG បានឯកភាពនឹងសំណើរបស់ឯកអគ្គរាជទូតកម្ពុជា ក្នុងការបន្ថែមចំនួនអាហារូបករណ៍សម្រាប់និស្សិតកម្ពុជា និងបានថ្លែងអំណរគុណដល់ស្ថានទូតដែលបានភ្ជាប់ទំនាក់ទំនងរវាងសាកលវិទ្យាល័យ និងក្រសួងសំខាន់ៗចំនួន ៣ របស់ប្រទេសកម្ពុជានាពេលកន្លងមក។ លោកសាកលវិទ្យាធិការ JANG ក៏បានបង្ហាញអំពីការប្តេជ្ញាចិត្តក្នុងការពង្រឹងទំនាក់ទំនងកិច្ចសហប្រតិបត្តិការទ្វេភាគីរវាងស្ថានទូត និងសាកលវិទ្យាល័យផងដែរ៕