សាឡាត់ ស្រីឡាង បង្ហាញអារម្មណ៍ហួសចិត្ត ក្រោយរងការយល់ច្រឡំមិនឈប់ ថាជាតារាសម្បូររឿងអាស្រូវ

តារាសម្តែងល្បីឈ្មោះធ្លាប់ក្តាប់បានតំណែងតួឯកសឹងតែគ្រប់រឿងកញ្ញា សាឡាត់ ស្រីឡាង បានបញ្ចេញប្រតិកម្មដោយបង្ហាញអារម្មណ៍ហួសចិត្តខ្លាំង ក្រោយមានអ្នកគិតថាខ្លួនជាតារាមិនល្អ សម្បូររឿងអាស្រូវ ពិសេសពាក់ព័ន្ធរឿងជំពាក់បំណុលជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីអំឡុងចុងឆ្នាំ២០២៤ កន្លងទៅ តារាសម្តែងស្រីកញ្ញា សាឡាត់ ស្រីឡាង បានបែកធ្លាយរឿងរ៉ាវបំណុល និងមានវិបិត្តផ្លូវចិត្តផងដែរ។ បន្ទាប់ពីរឿងនេះស្ងប់ស្ងាត់មួយរយ: ស្រាប់តែថ្មីៗតារាស្រីរូបនេះបានចេញមកបញ្ជាក់បន្ថែមពីបទពិសោធហួសចិត្ត ជាមួយមនុស្សជិតស្និត និងអ្នកធ្វើការជាមួយ។

តាមរយៈសារដែលបានបង្ហោះ កញ្ញា សាឡាត់ ស្រីឡាង បានបង្ហាញថា ខ្លួនតែងតែត្រូវបានគេចោទថា ជាតារាមានរឿងអាស្រូវ និងមិនល្អ ប៉ុន្តែពេលមានការងារ ឬត្រូវការជំនួយវិញ មនុស្សទាំងនោះតែងតែសុំខ្លួនឱ្យជួយផ្សព្វផ្សាយ ឬ Repost មាតិកាផ្សេងៗដោយមិនខានមួយករណីឡើយ។ កញ្ញាបានលើកឡើងដែរថា ស្ថានភាពបែបនេះធ្វើឱ្យខ្លួនមានអារម្មណ៍ឈឺចាប់ និងសង្ស័យចំពោះភាពស្មោះត្រង់របស់មនុស្សនៅជិតខ្លួនផងដែរ។

បន្ថែមពីនេះ តារាស្រីរូបនេះក៏បានបង្ហាញពីបញ្ហាហិរញ្ញវត្ថុ និងការងារដែលមិនទទួលបានប្រាក់ឈ្នួលត្រឹមត្រូវ ដោយអះអាងថា មានការងារជាច្រើនដែលខ្លួនបានធ្វើ ប៉ុន្តែមិនទទួលបានកម្រៃ ឬទទួលបានតិចតួចប៉ុណ្ណោះ។ ទោះជាយ៉ាងណា កញ្ញាបញ្ជាក់ថា ខ្លួនក៏នៅតែខិតខំប្រឹងប្រែង ដើម្បីរកប្រាក់ព្យាបាលម្តាយដែលកំពុងឈឺផងដែរ។

ស្រីឡាងក៏បានបញ្ជាក់ដែរថា ខ្លួនជាមនុស្សទទួលខុសត្រូវ និងមិនគេចវេសចំពោះបំណុលដែលនៅសល់ ប៉ុន្តែសុំឲ្យមានភាពយុត្តិធម៌ និងការយល់ចិត្តពីមនុស្សជុំវិញផងដែរ។ នាងបញ្ជាក់ថា មិនមានបំណងបង្កជម្លោះតាមបណ្តាញសង្គមឡើយ ប៉ុន្តែចង់ឲ្យមានការពិភាក្សាដោយត្រង់ទៅត្រង់មក ដើម្បីយល់ច្បាស់ពីបញ្ហា។

ការបង្ហោះសាររបស់កញ្ញា សាឡាត់ ស្រីឡាង លើកនេះ បានបង្កការចាប់អារម្មណ៍ពីមហាជន ខណៈមនុស្សមួយចំនួនបានបង្ហាញការគាំទ្រ និងយល់ចិត្តចំពោះស្ថានភាពរបស់តារាសម្តែងរូបនេះ ខណៈអ្នកខ្លះទៀតក៏នៅតែមានមតិខ្វែងគំនិតផងដែរ៕ ដោយ: ចាន់រ៉ា