រដ្ឋ​មន្រ្តី​ការពារ​ជាតិ​ម៉ាលី រង​ការបំផ្ទុះ​គ្រាប់​បែក ស្លាប់​​​ក្នុង​​ផ្ទះ​​ នៅ​ទី​ក្រុង Bamako

រដ្ឋ​មន្ត្រី​ក្រសួង​ការពារ​ជាតិ​​ប្រទេសម៉ាលី​នៅ​តំបន់​អាហ្វ្រិក​ លោក Sadio Camara ​ត្រូវបានសម្លាប់​នៅ​ក្នុងការបំផ្ទុះគ្រាប់​បែកអត្តឃាតមួយ​ ក្នុង​លំនៅដ្ឋាន​របស់ខ្លួន​នៅជិតរដ្ឋ​ធានី​ Bamako ។  នេះ​បើ​យោង​តាម​សារព័ត៌មាន BBC ផ្សាយ​ថ្ងៃ​ទី​២៧ ខែមេសា ឆ្នាំ​២០២៦ ។

ប្រព័ន្ធផ្សព្វផ្សាយជាច្រើនបាន​​​រាយការណ៍​ពីការស្លាប់របស់​ លោក Sadio Camara ជាផ្នែកមួយនៃ​រលកនៃការវាយប្រហារសម្រប​សម្រួលដោយ​ពួក​សកម្ម​ប្រយុទ្ធជីហាដ និងក្រុមបំបែកខ្លួននៅ​ទូទាំងប្រទេស។

ទូរទស្សន៍រដ្ឋបាន​បញ្ជាក់ពីការស្លាប់នេះ​ច្រើន​​ម៉ោងក្រោយ ដោយ​និយាយ​ថា លោក Sadio Camara បាន​ស្លាប់​ដោយ​សារ​របួស​​ក្នុង​ពេល​ប្រយុទ្ធជាមួយក្រុមវាយប្រហារ។

ក្រុម​ឧទ្ទាម Azawad Liberation Front (FLA) ជាក្រុមបំបែកខ្លួន ​និយាយថា៖ « ទាហានស៊ីឈ្នួលរុស្ស៊ីដែល​ជួលដោយយោធាម៉ាលី បាន​យល់ព្រមដកថយ​ពីទី​ក្រុង​ Kidal បន្ទាប់ពីការប៉ះទង្គិចគ្នារយៈពេលពីរថ្ងៃ​»។

គួរ​បញ្ជាក់​ថា អស់​រយៈពេលជាច្រើនឆ្នាំមកហើយ ប្រទេស​ម៉ាលីត្រូវ​បាន​ញាំញីដោយការបះបោរដោយក្រុមដែល​មានទំនាក់ទំនងជាមួយ​អាល់​កៃដា (al-Qaeda) ក្រុមរដ្ឋអ៊ីស្លាម និង FLA ។

ដោយ​ដកស្រង់សម្តីក្រុមគ្រួសារ​របស់ លោក Camara និងប្រព័ន្ធផ្សព្វផ្សាយបារាំង លើក​ឡើង​ថា៖ « ការវាយប្រហារនេះ បាន​ចាប់​ផ្តើម​ដោយ​ពួកសកម្មប្រយុទ្ធ​ដែលមានទំនាក់ទំនងជាមួយអាល់កៃដា ​នៅ​ទីក្រុង Kati កាលពីថ្ងៃសៅរ៍ និង​សម្លាប់សមាជិកគ្រួសារ​របស់ លោក Camara យ៉ាងហោចណាស់បីនាក់ផងដែរ»។

ចំណែក អ្នកនាំពាក្យរដ្ឋាភិបាល លោក Issa Ousmane Coulibaly លើក​ឡើង​ក្នុង​សេចក្តីថ្លែងការណ៍មួយនៅ​ល្ងាចថ្ងៃអាទិត្យ ថា៖ « លោក Camara ត្រូវបានសម្លាប់នៅពេលដែល​រថយន្តមួយផ្ទុក​ដោយគ្រឿង​ផ្ទុះ និងបើកបរដោយអ្នកវាយប្រហារ​ម្នាក់​កំណត់គោលដៅលើលំនៅដ្ឋានរបស់រដ្ឋមន្ត្រី»។

យ៉ាង​ណា ការវាយប្រហារនេះ​នាំឱ្យមានការដួលរលំនៃលំនៅដ្ឋាន​របស់ លោក Camara បំផ្លិចបំផ្លាញវិហារអ៊ីស្លាមមួយ​នៅក្បែរនោះ និង​សម្លាប់​អ្នកគោរពបូជាមួយចំនួនផងដែរ៕

ប្រែសម្រួល៖ ណឺ មិនា