អាមេរិក​លក់គ្រាប់​​ផ្លោង​​ «​ក្នុងគ្រាអាសន្ន​​» ទៅឲ្យអ៊ីស្រាអែល

ក្រសួងការបរទេសសហរដ្ឋអាមេរិកបានអនុម័តការលក់ «​ក្នុង​គ្រាអាសន្ន​» នៃគ្រាប់ផ្លោង​ចំនួន ១២០០០គ្រាប់ទៅឲ្យអ៊ីស្រាអែលនៅ​ទី៧ខែមីនា ខណៈដែលប្រទេសទាំង​២​នេះ​ កំពុងប្រយុទ្ធជាមួយអ៊ីរ៉ង់ នៅក្នុងសង្គ្រាមមជ្ឈិមបូព៌ាដែលកំពុងឆាបឆេះកាន់តែខ្លាំង។ នេះបើយោងតាមរបាយការណ៍ចេញផ្សាយដោយ CNN ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលក់កញ្ចប់គ្រាប់​ផ្លោង​ជិតកន្លះតោន​ (៤៥០គីឡូក្រាម) ដែលបានស្នើសុំ មានតម្លៃប្រមាណជា​​ទឹកប្រាក់​ ១៥១.៨ លានដុល្លារ ត្រូវបានអនុម័តដោយការិយាល័យកិច្ចការនយោបាយ-យោធារបស់ក្រសួងការបរទេស។ នេះបើយោងតាមសេចក្តីប្រកាសព័ត៌មាន។

ការិយាល័យនេះបាននិយាយនៅក្នុងសេចក្តីថ្លែងការណ៍មួយថា «ការលក់ដែលបានស្នើឡើង នឹងធ្វើឲ្យប្រសើរឡើងនូវសមត្ថភាព​​យោធា​​របស់អ៊ីស្រាអែលក្នុងការទប់ទល់នឹងការគំរាមកំហែងបច្ចុប្បន្ននិងអនាគត ពង្រឹងការការពារជាតិ​របស់​ពួកគេ​ និងបម្រើជាការ​ទប់ស្កាត់​ចំពោះការគំរាមកំហែងក្នុងតំបន់»។ បន្ថែមពីលើគ្រាប់​ផ្លោង​ទាំងនោះ​​ ការលក់នេះនឹងរួមបញ្ចូលសេវាកម្មវិស្វកម្មតាមកិច្ចសន្យារបស់រដ្ឋាភិបាលសហរដ្ឋអាមេរិក ភស្តុភារកម្ម និងជំនួយបច្ចេកទេស។

បើទោះជាបែនេះ​ក្ដី ក្នុងពេលដែលការលក់អាវុធរបស់អាមេរិក ជាធម្មតាតម្រូវឲ្យមានការយល់ព្រមពីសភាជាមុនសិន ហេតុដូច្នេះ រដ្ឋមន្ត្រីការបរទេសសហរដ្ឋអាមេរិក​ លោក Marco Rubio បានចេញលិខិតលើកលែងដោយរំលងការយល់ព្រម ដែលធ្វើឲ្យមន្ត្រីជាប់ឆ្នោតមួយចំនួនមានការភ្ញាក់ផ្អើលជាខ្លាំង។

ក្រសួងការបរទេស​សហរដ្ឋអាមេរិក បានលើកឡើងដោយដកស្រង់ច្បាប់គ្រប់គ្រងការនាំចេញអាវុធ ថា រដ្ឋមន្ត្រីការបរទេសបានកំណត់ និងផ្តល់យុត្តិកម្មលម្អិតថា ក្នុងគ្រាអាសន្នមួយដែលតម្រូវឲ្យមានការលក់​ក្នុងគ្រាអាសន្ន​ទៅរដ្ឋាភិបាលអ៊ីស្រាអែល​ អនុលោម​តាមមាត្រាការពារជាតិ និងសេវាកម្មការពារជាតិខាងលើគឺស្ថិតនៅក្នុងផលប្រយោជន៍សន្តិសុខជាតិរបស់សហរដ្ឋអាមេរិក៕

អត្ថបទ៖ សាង ស្រីល័ក្ខ