ថ្នាក់ដឹកនាំខេត្តកំពង់ឆ្នាំង ចុះសួរសុខទុក្ខ និងនាំអំណោយជូនកងទ័ពឈរជើងព្រះវិហារ ព្រមទាំងគ្រួសាររងគ្រោះខ្យល់កន្ត្រាក់

លោកជំទាវ កែ ច័ន្ទមុនី សមាជិកាក្រុមសភាជាតិកម្ពុជា នៃអ្នកនយោបាយសភាស្រ្តី និងជាអ្នកតំណាងរាស្រ្តមណ្ឌលកំពង់ឆ្នាំង លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង លោកឧត្តមសេនីយ៍ត្រី អ៊ុំ សោភា មេបញ្ជាកាតំបន់ប្រតិបត្តិការសឹករងកំពង់ឆ្នាំង លោក សេង វិចិត្រ្ត អភិបាលស្រុករលាប្អៀរ ព្រមទាំងក្រុមការងារ នៅថ្ងៃទី២៩ ខែមេសា ឆ្នាំ២០២៦នេះ បានអញ្ជើញចុះសួរសុខទុក្ខ និងនាំយកអំណោយជូនវិរៈកងទ័ព ឈ្មោះ ហេង លីហួ ដែលកំពុងឈរជើងការពារទិសប្រាសាទព្រះវិហារ។

ក្នុងឱកាសនោះ ក្រុមការងារក៏បានអញ្ជើញទៅសួរសុខទុក្ខក្រុមគ្រួសាររបស់វិរៈកងទ័ពខាងលើ ដែលប្រពន្ធឈ្មោះ យឺន សុីណា បានរងគ្រោះដោយសារខ្យល់កន្ត្រាក់ កាលពីថ្ងៃទី២៨ ខែមេសា ឆ្នាំ២០២៦ បណ្ដាលឲ្យរបើកដំបូលផ្ទះ ស្ថិតនៅភូមិទ្រាត្បូង ឃុំស្រែថ្មី ស្រុករលាប្អៀរ ខេត្តកំពង់ឆ្នាំង។

ថ្នាក់ដឹកនាំបានសម្តែងនូវការយកចិត្តទុកដាក់ សួរសុខទុក្ខ និងលើកទឹកចិត្តដល់គ្រួសាររងគ្រោះ ព្រមទាំងបានផ្តល់អំណោយមួយចំនួន ដើម្បីជួយសម្រាលទុក្ខលំបាកក្នុងជីវភាពរស់នៅប្រចាំថ្ងៃ៕

ដោយ ៖ វ៉ាន់ សេដ្ឋា