ព័ត៌មានជាតិ

អាជ្ញាធរខេត្តសៀមរាប ចុះសួរសុខទុក្ខ និងរៀបចំផែនការទទួលជនភៀសសឹកស្នាក់នៅក្នុងភូមិសាស្ត្រស្រុកបន្ទាយស្រី

បានផុស

៤ ខែ មុន

នៅ

ថ្ងៃសុក្រ ១២ ធ្នូ ២០២៥

ដោយ

នៅថ្ងៃទី ១២ ខែធ្នូ ឆ្នាំ ២០២៥ នេះ លោក សុខ ថុល អភិបាលរងខេត្តសៀមរាប បានដឹកនាំក្រុមការងារ ដោយមានការចូលរួមពីអាជ្ញាធរមូលដ្ឋាន បានអញ្ជើញចុះសួរសុខទុក្ខ និងរៀបចំផែនការទទួលជនភៀសសឹកដែលកំពុងស្នាក់នៅវត្តចំនួន ៤ ក្នុងស្រុកបន្ទាយស្រី ដើម្បីធ្វើយ៉ាងណាផ្គត់ផ្គង់គ្រឿងឧបភោគបរិភោគ និងរៀបចំកន្លែងស្នាក់នៅឱ្យបានសមរម្យ។

នាឱកាសនោះ លោក សុខ ថុល បានណែនាំដល់អាជ្ញាធរមូលដ្ឋាន និងក្រុមការងារគ្រប់គ្រងទីតាំងសុវត្ថិភាពទាំង ៤ មានវត្តបន្ទាយស្រី វត្តប្រាសាទនាគគូ វត្តប្រិយ៍ និងវត្តព្រះដាក់ ត្រូវពង្រឹងការយកចិត្តទុកដាក់ខ្ពស់ និងបំពេញតម្រូវការចាំបាច់ជាបន្ទាន់ជូនដល់ជនភៀសសឹក ខណៈពេលដែលចំនួនជនភៀសសឹកកាន់តែកើនឡើងច្រើន។

ក្នុងនាមរដ្ឋបាលខេត្ត លោក សូមថ្លែងអំណរគុណយ៉ាងជ្រាលជ្រៅចំពោះសប្បុរសជនដែលមានចិត្តសប្បុរសក្នុងស្មារតីខ្មែរជួយខ្មែរ ដោយចូលរួមឧបត្ថម្ភគាំទ្រនូវធនធានផ្ទាល់ខ្លួនដល់ប្រជាពលរដ្ឋដែលបានជម្លៀសខ្លួនមកកាន់ខេត្តសៀមរាប រកទីតាំងសុវត្ថិភាព។

លោកក៏បានអំពាវនាវ ឯកឧត្ដម លោកជំទាវ អ្នកឧកញ៉ា លោក លោកស្រី ម្ចាស់ក្រុមហ៊ុន សហគ្រាស ពាណិជ្ជករ អាជីវករ និង ប្រជាពលរដ្ឋដែលនៅតាមបណ្ដាក្រុង ស្រុក អាចចូលរួមបន្តឧបត្ថម្ភគាំទ្រនូវគ្រឿងឧបភោគបរិភោគ និងសម្ភារប្រើប្រាស់បានតាមរយៈក្រុង ស្រុកផ្ទាល់ ឬតាមរយៈរដ្ឋបាលខេត្ត៕

អត្ថបទ ៖ គឿនវេត