វ៉េណេស៊ុយអេឡា ត្រៀមតតាំងក្តីនៅ ICJ ដណ្ដើម​យក​ទឹកដី ដែលសម្បូរមាស និងប្រេង

លោកស្រី Delcy Rodríguez ប្រធានាធិបតីស្តីទីនៃប្រទេសវ៉េណេស៊ុយអេឡា បានធ្វើដំណើរទៅដល់ប្រទេសហូឡង់ហើយ កាលពីថ្ងៃអាទិត្យ ទី​១០ ខែ​ឧសភា ដើម្បីត្រៀមតតាំងក្តី នៅចំពោះមុខតុលាការយុត្តិធម៌អន្តរជាតិ (ICJ) ពាក់ព័ន្ធនឹងវិវាទដីធ្លីដ៏រ៉ាំរ៉ៃជាមួយប្រទេសហ្គីយ៉ាន (Guyana)។

យោងតាម​ Washington Times ជម្លោះ ដែលអូសបន្លាយរាប់សិបឆ្នាំមកនេះ គឺការដណ្តើមគ្នាកាន់កាប់តំបន់ Essequibo ដែលជាទឹកដីព្រៃភ្នំមានទំហំជិត ១៦ម៉ឺនគីឡូម៉ែត្រការ៉េ។ តំបន់នេះ មិនមែនជាដីធម្មតាឡើយ ប៉ុន្តែវាជាជម្រកនៃធនធានធម្មជាតិមហាសាល រួមមាន មាស ពេជ្រ ឈើប្រណីត និងជាពិសេសគឺមានប្រភពប្រេងកាតដ៏ធំសម្បើម នៅតាមបណ្តោយឆ្នេរសមុទ្រ។ វ៉េណេស៊ុយអេឡា បានអះអាងថា តំបន់នេះ ជារបស់ខ្លួនតាំងពីសម័យអាណានិគមអេស្ប៉ាញមកម្ល៉េះ ប៉ុន្តែតាមការសម្រេចកាលពីឆ្នាំ១៨៩៩ ដោយក្រុមអាជ្ញាកណ្តាលមកពីអង់គ្លេស រុស្ស៊ី និងអាមេរិក បានបោះបង្គោលព្រំដែនឱ្យទឹកដីភាគច្រើនធ្លាក់ទៅក្នុងដៃហ្គីយ៉ានវិញ។

ក្រោយពីចុះពីយន្តហោះនៅទីក្រុង Amsterdam លោកស្រី Rodríguez ដែលទើបឡើងកាន់អំណាចកាលពីខែមករា ជំនួសលោក នីកូឡាស ម៉ាឌូរ៉ូ បានថ្លែងថា ប្រទេសរបស់លោកស្រី មានភស្តុតាងប្រវត្តិសាស្ត្រគ្រប់គ្រាន់ តាំងពីសម័យកកើតរដ្ឋធានីដំបូងមកម្ល៉េះ ដើម្បីបង្ហាញថា ទឹកដីនេះជារបស់វ៉េណេស៊ុយអេឡា។ លោកស្រី នឹងឡើងការពារក្តីជាលើកចុងក្រោយនៅថ្ងៃចន្ទនេះ ខណៈដែលតុលាការ អាចនឹងចំណាយពេលរាប់ខែទៀត ទើបចេញសេចក្តីសម្រេចជាផ្លូវការ ដែលបិទផ្លូវតវ៉ា។

សម្រាប់ភាគីខាងហ្គីយ៉ានវិញ រដ្ឋមន្ត្រីការបរទេសលោក Hugh Hilton Todd បានលើកឡើងប្រាប់ចៅក្រមអន្តរជាតិថា វិវាទនេះ ប្រៀបដូចជាស្រមោលអាក្រក់ ដែលតាមលងបន្លាចអធិបតេយ្យភាពរបស់ប្រទេសលោក តាំងពីដើមមក។ លោកបានបញ្ជាក់ថា ប្រសិនបើចាញ់ក្តីនេះ ហ្គីយ៉ាន នឹងត្រូវបាត់បង់ទឹកដីរហូតដល់ទៅ ៧០ភាគរយនៃប្រទេសទាំងមូល។

សូម​ជម្រាប​ថា បើទោះបីជាវ៉េណេស៊ុយអេឡា ចូលរួមតតាំងក្តីក៏ដោយ ប៉ុន្តែ​ក៏​បានព្រមានទុកជាមុនដែរថា ខ្លួនមិនទាន់ទទួលស្គាល់អំណាចពេញលេញរបស់តុលាការអន្តរជាតិ​មួយ​នេះទាំងស្រុង​នោះ​ឡើយ៕

ប្រែសម្រួល៖ ឈាង