ព័ត៌មានជាតិ

ក្រុមហ៊ុន ម៉ុង ឫទ្ធី ដាក់ចេញផែនការ ៥ ឆ្នាំ វិនិយោគកសិដ្ឋានចិញ្ចឹមគោផលិតទឹកដោះផ្គត់ផ្គង់ទីផ្សារ

បានផុស

២ ថ្ងៃ មុន

នៅ

ថ្ងៃសុក្រ ៥ មិថុនា ២០២៦

ដោយ

ក្រុមហ៊ុន ម៉ុង ឫទ្ធី បានដាក់ចេញផែនការក្នុងការវិនិយោគកសិដ្ឋានចិញ្ចឹមគោយកទឹកដោះ ស្របពេលតម្រូវការទឹកដោះគោក្នុងស្រុកកំពុងមានការកើនឡើង។

យ៉ាងណាមិញ គម្រោងវិនិយោគរបស់ក្រុមហ៊ុនស្ថិតនៅក្នុងផែនការរយៈពេលវែង ដោយសារក្រុមហ៊ុនមើលឃើញបញ្ហាប្រឈមមួយចំនួន ខណៈក្រុមហ៊ុនត្រូវពង្រឹងយកចិត្តទុកដាក់លើគម្រោងអាទិភាពផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លី ឡាវីល នាយកចាត់ការទូទៅផ្នែកចិញ្ចឹមសត្វរបស់ក្រុមហ៊ុន ម៉ុង ឫទ្ធី បានប្រាប់កម្ពុជាថ្មីថា គម្រោងបង្កើតកសិដ្ឋានចិញ្ចឹមគោយកទឹកដោះ ត្រូវបានក្រុមហ៊ុនដាក់ក្នុងផែនការវិនិយោគ ៥ ឆ្នាំទៅមុខទៀត ដោយសារត្រូវការពេលវេលាសិក្សាលម្អិតច្រើនពាក់ព័ន្ធនឹងការរៀបចំទីតាំងកសិដ្ឋាន។

លោក លី ឡាវីល បានបញ្ជាក់ថា «ផ្អែកលើផែនការរបស់ក្រុមហ៊ុន កសិដ្ឋានចិញ្ចឹមគោយកទឹកដោះនេះ អាចនឹងចាប់ផ្ដើមនៅឆ្នាំ ២០២៨ គឺក្រោយគម្រោងដទៃទៀត តាមផែនការអាទិភាពរបស់ក្រុមហ៊ុន»។

ក្នុងពិធីសម្ពោធរោងចក្រផលិតកែច្នៃកៅស៊ូ របស់ក្រុមហ៊ុន គីមស៍ រ៉ាប់ប៊ើរ (ខេមបូឌា) នៅស្រុកត្បូងឃ្មុំ ខេត្តត្បូងឃ្មុំ សម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជាបានជំរុញឱ្យមានការផលិតនិងកែច្នៃផលិតផលប្រើប្រាស់ក្នុងស្រុកឲ្យបានច្រើន និងណែនាំឲ្យក្រសួងមានសមត្ថកិច្ចពិនិត្យលទ្ធផលផ្តល់ការលើកទឹកចិត្តលើមុខទំនិញចាំបាច់ សំដៅធានានូវការផ្គត់ផ្គង់បានគ្រប់គ្រាន់នៅក្នុងប្រទេស។

សម្តេចបានលើកពីផលិតផលសក្តានុពលចំនួន ៣ ដែលមាន ទឹកដោះគោ មី ស្ករស ដោយសម្តេចចង់ជំរុញឱ្យមានការផលិតក្នុងស្រុកកាត់បន្ថយការនាំចូល និងឈានទៅកាត់ផ្ដាច់ការនាំចូលទាំងស្រុង។

របាយការណ៍ពីក្រសួងពាណិជ្ជកម្មបានបង្ហាញពីកំណើនការប្រើប្រាស់ផលិតផលក្នុងស្រុកបានកើនឡើងដល់ ៣០% នៃចំណែកទីផ្សារ ក្រោយការធ្វើពហិការផលិតផលថៃដែលនាំឲ្យសហគ្រាសក្នុងស្រុកខិតខំពង្រីកខ្សែសង្វាក់ផលិតកម្ម ឆ្លើយតបតម្រូវការប្រើប្រាស់ក្នុងស្រុក។

កំណើននេះឆ្លើយតបតាមរយៈសន្ទុះនៃការងាកមកប្រើប្រាស់ទំនិញផលិតក្នុងស្រុក ដែលកំពុងដើរតួនាទីយ៉ាងសំខាន់ក្នុងការលើកកម្ពស់សហគ្រាសធុនតូច និងមធ្យម (SMEs) បង្កើនផលិតកម្មដើម្បីជំនួសផលិតផលនាំចូល។

ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា នៅក្នុងវេទិកាសារព័ត៌មានក្រោមយុទ្ធនាការ «រួមគ្នាផលិត រួមគ្នាប្រើផលិតផលជាតិ» បានបង្ហាញការភ្ញាក់ផ្អើលក្រោយលោកទទួលបានរបាយការណ៍ពីក្រសួងពាណិជ្ជកម្មពីកំណើនការប្រើប្រាស់ផលិតផលក្នុងស្រុក ដែលបានស្រូបចំណែកទីផ្សារកើនឡើងដល់ប្រមាណ ៣០%។

លោកឧកញ៉ា តែ តាំងប៉ បានសង្កេតឥរិយាបថរបស់ប្រជាជនខ្មែរ បានងាកមកគាំទ្រផលិតផលក្នុងស្រុកក្នុងសន្ទុះមួយយ៉ាងផុលផុស មិនថាតែប្រជាពលរដ្ឋទូទៅ សូម្បីតែក្មេងៗក៏មានការយល់ដឹងច្រើនក្នុងការចូលរួមពហិការមិនប្រើប្រាស់ផលិតផលថៃ។

លោកប្រៀបធៀបកាលពីជិត ២០ ឆ្នាំមុន ផលិតផលខ្មែរមានចំណែកទីផ្សារត្រឹមតែ ២% ប៉ុណ្ណោះ។ ប៉ុន្តែបច្ចុប្បន្ននេះចំណែកទីផ្សារផលិតផលក្នុងស្រុកបានកើនដល់ ៣០% ឯការនាំចូលនៅសល់ ៧០%។ នេះបង្ហាញនៃឆន្ទៈនៃការគាំទ្រផលិតផលផលិតក្នុងស្រុក កំពុងមានសន្ទុះគាំទ្រកាន់តែខ្លាំង៕