សេដ្ឋកិច្ច

របាយការណ៍ធនាគារពិភពលោកថាកម្ពុជារងផលប៉ះពាល់ធំៗ៣ក្នុងឆ្នាំ២០២៦ តែនៅតែរក្សាភាពធន់បាន

បានផុស

២២ នាទី មុន

នៅ

ថ្ងៃអង្គារ ៩ មិថុនា ២០២៦

ដោយ

ធនាគារពិភពលោកបានព្យាករណ៍ថាក្នុងឆ្នាំ២០២៦នេះ សេដ្ឋកិច្ចកម្ពុជាអាចមានកំណើនត្រឹម៣,៩%ប៉ុណ្ណោះ ដែលបណ្ដាលមកពីវិបត្តិចំនួន៣គឺ ការកើនឡើងតម្លៃប្រេង ការធ្លាក់ចុះនៃប្រាក់ផ្ញើពីពលកម្មក្រៅប្រទេស និងការផ្ដល់កម្ចីកាន់តែតឹងរឹង។ ទោះជាយ៉ាងណាសេដ្ឋកិច្ចប្រទេសនេះកំពុងបង្ហាញភាពធន់ ដោយមានការទ្រទ្រង់ពីការកើនឡើងនៃការវិនិយោគបរទេស និងការនាំចេញដ៏រឹងមាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងរបាយការណ៍មានចំណងជើងថា ពុះពារឆ្លងវិបត្តិ (Navigationg Shocks) ដែលត្រូវបានផ្សព្វផ្សាយនៅថ្ងៃទី៩ ខែមិថុនា ឆ្នាំ២០២៦នេះ ធនាគារពិភពលោកបានវាយតម្លៃថា វិបត្តិប្រេងសាំងសាកលបានជះផលប៉ះពាល់ដល់ការធ្វើដំណើរ និងតម្លៃផលិតកម្មរបស់ក្រុមហ៊ុនជាហេតុធ្វើឱ្យមានការពិបាកក្នុងការរក្សាការងារសម្រាប់ពលករ ហើយស្ថានភាពនេះកើតឡើងចំពេលដែលសេដ្ឋកិច្ចកំពុងប្រឈមនឹងការធ្លាក់ចុះវិស័យអចលនទ្រព្យ និងការធ្លាក់ចុះនៃប្រាក់ផ្ញើពីក្រៅប្រទេសបន្ទាប់ពីពលករខ្មែរត្រលប់ពីថៃវិញ ហើយអតិផរណាកើនឡើង៥,៨% ដែលប៉ះទង្គិចខ្លាំងដល់គ្រួសារដែលមានចំណូលទាប។

ក្នុងរបាយការណ៍នោះបានសរសេរថា៖ «ការរួមបញ្ចូលគ្នានៃការកើនឡើងតម្លៃប្រេងឥន្ធនៈ ការផ្ទេរប្រាក់ពីក្រៅប្រទេសធ្លាក់ចុះបន្ទាប់ពីការវិលត្រឡប់របស់ពលករចំណាកស្រុកជិតមួយលាននាក់ និងឥណទានក្នុងស្រុកខ្សោយ ជាមួយនឹងការធ្លាក់ចុះវិស័យសំណង់ និងកង្វះការធានារ៉ាប់រងគម្រោងកំពុងរារាំងកំណើនដល់ការព្យាករណ៍ ៣,៩%ភាគរយនៅឆ្នាំ២០២៦ដែលបំផ្លាញប្រាក់ចំណូលពិតប្រាកដ និងបានគំរាមកំហែងដោយជំរុញឱ្យមនុស្សជាងមួយលាននាក់ឱ្យធ្លាក់ក្នុងភាពក្រីក្រ»។

ប្រធានគ្រប់គ្រងធនាគារពិភពលោកប្រចាំកម្ពុជាលោកស្រី Tania Meyer បានថ្លែងក្នុងពិធីផ្សព្វផ្សាយរបាយការណ៍នៅថ្ងៃទី៩ ខែមិថុនា ឆ្នាំ២០២៦នេះ នៅសណ្ឋាគារឡឺរ៉ូយ៉ាល់ភ្នំពេញថា សម្ពាធទាំងនេះបានធ្លាក់ដល់ពលរដ្ឋ និងអ្នករកស៊ីនៅក្នុងប្រទេសកម្ពុជា ខណៈរដ្ឋាភិបាលបានដាក់ចេញគោលនយោបាយមួយចំនួនដើម្បីឆ្លើយតបនឹងបញ្ហាទាំងអស់នេះដែលមានប្រសិទ្ធភាព។

លោកស្រីថា៖ «សេដ្ឋកិច្ចកម្ពុជាកំពុងប្រឹងទប់ខ្លួនបាននៅចំពោះមុខសភាពការណ៍ប៉ះទង្គិចច្រើនយ៉ាងក្នុងពេលដំណាលគ្នា ប៉ុន្តែនៅតែបង្ហាញនូវភាពធន់ទ្រាំ ដែលអាចរក្សាបានតាមរយៈវិធានការគោលនយោបាយដែលមានគោលដៅច្បាស់លាស់ ដើម្បីការពារការងារ និងជីវភាពរស់នៅរបស់ប្រជាពលរដ្ឋ»។

រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោកឧបនាយករដ្ឋមន្ត្រី វង្ស៊ី វិស្សុត បានបញ្ចេញយោបល់របស់លោកផងដែរក្នុងវេទិកានេះដោយថា រដ្ឋាភិបាលក៏បានពិភាក្សាគ្នាលំអិតលើបញ្ហានេះដែរ ខណៈលោកជំរុញដល់អង្គការពាក់ព័ន្ធ និងធនាគារពិភពលោកជួយដល់ការឆ្លើយតបរបស់រដ្ឋាភិបាលលើវិបត្តិ។

លោកបន្ថែមថា៖ «រដ្ឋាភិបាលធ្វើការយ៉ាងសកម្មដូចដែលខ្ញុំបាននិយាយឆ្លើយតបនឹងវិបត្តិយើងត្រូវធ្វើឱ្យមូលដ្ឋានគ្រឹះយើងរឹងមាំ វាក៏ពាក់ព័ន្ធនឹងបញ្ហារចនាសម្ព័ន្ធរបស់យើងដែរ។ តែខ្ញុំគិតថាកម្ពុជាមានភាពធន់ បើធៀបនឹងប្រទេសផ្សេងទៀតបើយើងមើលលើមូលដ្ឋានគ្រឹះ។ បញ្ហាមួយទៀតគឺការឆ្លើយតបបើសិនយើងឆ្លើយតបល្អប្រទេសយើងនឹងមានសុវត្ថិភាពនៅឆ្នាំទៅមុខ»។

ផ្ទុយទៅនឹងការប្រឈមទាំងនេះ ការវិនិយោគផ្ទាល់ពីបរទេសបានឡើងដល់ ៥,១ ប៊ីលានដុល្លារអាម៉េរិក នៅក្នុងឆ្នាំ២០២៥ ដោយជួយបង្កើតការងារផ្លូវការប្រមាណ ៤០០ ០០០ ការងារ ហើយតាមរយៈនេះវាបានផ្តល់ឱកាសការងារសំខាន់ៗច្រើន សម្រាប់កម្មករដែលប្តូរពីវិស័យកសិកម្ម និងសម្រាប់ពលករចំណាកស្រុកដែលបានត្រឡប់មកពីប្រទេសថៃវិញ។ ការនាំចេញទំនិញក៏នៅរឹងមាំផងដែរ ដោយកើនឡើងបាន ១៧,៧ ភាគរយ នៅក្នុងត្រីមាសទីមួយ ឆ្នាំ២០២៦។ កំណើនផលិតផលក្នុងស្រុកសរុបពិតប្រាកដត្រូវបានព្យាករថានឹងថយចុះមកត្រឹម ៣,៩ ភាគរយ នៅឆ្នាំ២០២៦ មុនពេលងើបឡើងវិញដល់ ៤,៩ ភាគរយ នៅឆ្នាំ២០២៧៕

អត្ថបទដោយ ហ៊ុន សិរីវឌ្ឍន៍

Related Topics:ធនាគារពិភពលោក

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា