លោកស្រី Böttcher ប្រកាសឧបត្ថម្ភ ៥ពាន់ដុល្លារ ដល់ស្ត្រីមេម៉ាយរងគ្រោះម្នាក់ ដើម្បីជាដើមទុនកសាងជីវិតថ្មី

ក្រោយបានឃើញស្ថានភាពដ៏គួរឱ្យអាណិតរបស់ស្ត្រីមេម៉ាយម្នាក់ ដែលត្រូវបានរាយការណ៍ថា បានរងការធ្វើបាប និងហិង្សា ពីម្ចាស់ហាង កាកាសាឡន លោកស្រី Sophea Böttcher បានប្រកាសផ្តល់ថវិកាចំនួន ៥,០០០ ដុល្លារអាមេរិក ដើម្បីជួយឱ្យស្ត្រីរងគ្រោះ ដើម្បីជាដើមទុនចាប់ផ្តើមអាជីវកម្មផ្ទាល់ខ្លួន អាចរស់នៅដោយសេចក្តីថ្លៃថ្នូរ និងកសាងជីវិតថ្មី។

តាមរយៈទំព័រហ្វេសប៊ុក នៅថ្ងៃទី២៩ ខែមិថុនា ឆ្នាំ២០២៦ លោកស្រីបានលើកឡើងថា ការសម្រេចចិត្តជួយនេះ កើតចេញពីក្តីមេត្តា និងការអាណិតអាសូរយ៉ាងជ្រាលជ្រៅ បន្ទាប់ពីបានឃើញទឹកមុខ និងបានដឹងពីការឈឺចាប់ដែលស្ត្រីរងគ្រោះបានឆ្លងកាត់។ លោកស្រីបញ្ជាក់ថា ទឹកមុខដ៏ស្លូតបូត សុភាពរាបសារ និងគួរឱ្យអាណិតរបស់គាត់ បានធ្វើឱ្យលោកស្រីមានអារម្មណ៍ក្តុកក្តួល និងស្រក់ទឹកភ្នែក។

លោកស្រីក៏បានសង្កត់ធ្ងន់ថា គ្មានមនុស្សណាម្នាក់សមនឹងទទួលរងការវាយដំ ការប្រមាថ ឬការជិះជាន់ឡើយ។ ផ្ទុយទៅវិញ អ្នកដែលកំពុងរងទុក្ខ គួរតែទទួលបានការអាណិតអាសូរ ក្តីស្រឡាញ់ ការគោរព និងឱកាសដើម្បីចាប់ផ្តើមជីវិតថ្មី។

ជាមួយគ្នានេះ លោកស្រីក៏បានអំពាវនាវដល់សាធារណជន ជួយចែករំលែកព័ត៌មាននេះ ដើម្បីឱ្យស្ត្រីរងគ្រោះ ឬអ្នកដែលស្គាល់គាត់ អាចទាក់ទងមកក្រុមការងាររបស់លោកស្រី ដើម្បីទទួលបានការឧបត្ថម្ភ។

ការប្រកាសផ្តល់ជំនួយនេះ ត្រូវបានមហាជនជាច្រើនសាទរ និងចាត់ទុកថា ជាទឹកចិត្តដ៏ថ្លៃថ្នូរ ដែលអាចជួយឱ្យស្ត្រីរងគ្រោះមានឱកាសឈរជើងដោយខ្លួនឯង និងចាប់ផ្តើមជីវិតថ្មីដោយក្តីសង្ឃឹម និងសេចក្តីថ្លៃថ្នូរ៕