ព័ត៌មានអន្ដរជាតិ

UN ព្រមាន ថា បាតុភូត El Nino នឹងវិវឌ្ឍយ៉ាងឆាប់រហ័ស និងខ្លាំងបំផុតនៅប៉ុន្មានខែខាងមុខ

បានផុស

៥៨ នាទី មុន

នៅ

ថ្ងៃសុក្រ ៣ កក្កដា ២០២៦

ដោយ

ទីភ្នាក់ងារបម្រែបម្រួលអាកាសធាតុរបស់អង្គការសហប្រជាជាតិ(UN)ព្រមាននៅថ្ងៃសុក្រ ថា បាតុភូត El Nino នឹងវិវឌ្ឍយ៉ាងឆាប់រហ័សនិងខ្លាំងក្លាបំផុត រវាងខែកក្កដា និងខែកញ្ញា បង្កឱ្យមានការប្រែប្រួលអាកាសធាតុដ៏អាក្រក់នៅតំបន់ជាច្រើនជុំវិញពិភពលោក។

ទីភ្នាក់ងារសារព័ត៌មាន AFP នៅថ្ងៃទី០៣ ខែកក្កដា ឆ្នាំ២០២៦ តាមរយៈអង្គការឧតុនិយមពិភពលោក(WMO) ឱ្យដឹងថា បាតុភូត El Nino បានចាប់ផ្តើមកើតឡើង ហើយ វានឹងកើនឡើងយ៉ាងឆាប់រហ័ស ខណៈអង្គការនេះក៏ព្រមានឱ្យប្រទេសនានាត្រៀមខ្លួនសម្រាប់ផលប៉ះពាល់។

ប្រមុខ UN លោក António Guterres ។ រូបភាព៖ UN

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

El Nino គឺជាបាតុភូតអាកាសធាតុធម្មជាតិមួយ ធ្វើឱ្យសីតុណ្ហភាពផ្ទៃទឹកនៅមហាសមុទ្រប៉ាស៊ីហ្វិកកណ្តាល និងខាងកើត ឡើងកម្តៅ នាំមកនូវការប្រែប្រួលខ្យល់ សម្ពាធ និងលំនាំទឹកភ្លៀងទូទាំងពិភពលោក។ ជាធម្មតាវាកើតឡើងរៀងរាល់ ២ ទៅ ៧ឆ្នាំម្តង ហើយមានរយៈពេលប្រហែល៩ ទៅ ១២ខែ។

តាមការតាមដានអាកាសធាតុតាមរដូវសកលប្រចាំខែរបស់ WMO ចង្អុលបង្ហាញពីការវិវត្តយ៉ាងឆាប់រហ័សរបស់វា ទៅជាបាតុភូតដ៏ខ្លាំងក្លា អំឡុងខែកក្កដាដល់ខែកញ្ញា។

ការប្រែប្រួលអាកាសធាតុដោយបាតុភូត El Nino ។ រូបភាព៖ NOAA

ទីភ្នាក់ងារអង្គការសហប្រជាជាតិចាត់ថ្នាក់បាតុភូត El Nino ថា មានទាំងកម្រិតខ្សោយ មធ្យម ខ្លាំង ឬខ្លាំងបំផុត មានន័យថាត្រូវបានកំណត់ឱ្យឈានដល់កម្រិតខ្ពស់បំផុតទីបីក្នុងចំណោមបួន។

អង្គការ WMO និយាយថា៖ « ស្ថានភាព El Nino បានវិវត្តនៅក្នុងតំបន់ត្រូពិចប៉ាស៊ីហ្វិក និងត្រូវបានព្យាករណ៍ថានឹងកើតឡើងកាន់តែខ្លាំងឡើងយ៉ាងឆាប់រហ័សក្នុងរយៈពេលប៉ុន្មានខែខាងមុខ ជាពិសេសបង្កើនលទ្ធភាពឱ្យមានការប្រែប្រួលអាកាសធាតុធ្ងន់ធ្ងរ ក្នុងតំបន់ជាច្រើននៃពិភពលោក»។

ការព្យាករណ៍ដោយមជ្ឈមណ្ឌលអាកាសធាតុពិភពលោក ប្រើគំរូផ្សេងៗគ្នា បង្ហាញពីការឡើងកំដៅនៃសីតុណ្ហភាពមហាសមុទ្រជាប់លាប់ និងសំខាន់នៅទូទាំងតំបន់អេក្វាទ័រកណ្តាល និងខាងកើតនៃមហាសមុទ្រប៉ាស៊ីហ្វិក៕

សម្រួល៖ ណឺ មិនា