អាជ្ញាធរក្រុងសំរោង ចុះបិទទីតាំងKTV ក្រោយរកឃើញអ្នកវិជ្ជមានកូវីដ-១៩ ២២នាក់

ខេត្តឧត្តរមានជ័យ៖ អាជ្ញាធរក្រុងសំរោងនិងសមត្ថកិច្ចចំរុះចុះបិទខ្ទប់ទីតាំងKTV អូរស្មាច់៥៥៥ មួយកន្លែងជាបណ្តោះសន្នដោយរកឃើញអ្នកវិជ្ជមានកូវិដ–១៩ចំនួន២២នាក់ក្នុងចំណោម៣៤នាក់។

​លោក​ លី​ រដ្ឋា​ អភិបាលរងក្រុង​ បានដឹកនាំក្រុមការងារ​វេនប្រចាំការ​នៃក្រុមការងារ​កូវីដ​-១៩ ក្រុងសំរោង​ សហការជាមួយ​ក្រុមការងារ​សុខាភិបាល​ អាជ្ញាធរមូលដ្ឋាន​ភូមិសង្កាត់​ នៅថ្ងៃទី០១​ ខែសីហា​ ឆ្នាំ​២០២១ ចុះស្រាវជ្រាវ ​និងយកសំណាក​ អ្នកដែលមានការពាក់ព័ន្ធ​កូវីដ​-១៩​ នៅទីតាំង​ KTV អូរស្មាច់៥៥៥​ នៅភូមិរួតចំប៉ី សង្កាត់អូរស្មាច់។

អ្នកដែលបានយកសំណាកសរុប​ចំនួន ៣៤នាក់​ ស្រី ២២នាក់ លទ្ធផលទទួលបាន​ពីឧបករណ៍តេស្តរហ័ស​ គឺមានវិជ្ជមានកូវីដ–១៩ ចំនួន​ ២២នាក់​ ស្រី​ ១៧នាក់​។ អ្នកវិជ្ជមានកូវីដ–១៩ ទាំង​ ២២នាក់​ ត្រូវបានក្រុមគ្រូពេទ្យ​ បញ្ជូលទៅព្យាបាល​ នៅមណ្ឌលវិទ្យាល័យ​ តេជោ​ សែន​ សសំរោង។

សម្រាប់វិធានការចំពោះមុខ​ ក្រុមការងារបានធ្វេីការបិទខ្ទប់​ ទីតាំង KTV  អូរស្មាច់៥៥៥​ និងធ្វេីការបិទខ្ទប់ខ្នងផ្ទះប្រជាពលរដ្ឋ​ ស្ថិតក្នុងបរិវេណ​ម្តុំនោះទាំងអស់​ ដេីម្បីទប់ស្កាត់ការឆ្លង និងរីករាលដាលក្នុងសហគមន៍។

កម្លាំងប្រចាំការទីតាំងបិទខ្ទប់ខាងលេីមាន​ កងកម្លាំងយោធា​ ភូមិភាគ៤​ ចំនួន០៧​នាក់​ កម្លាំងប៉ូលីសប៉ុសិ៍អូរស្មាច់ ចំនួន​០៦​នាក់​ និងកម្លាំងប្រជាការពារភូមិផងដែរ៕

អត្ថបទ៖ ចាន់ ធី