រកឃើញ កូនសិស្សលោក ២ នាក់ នៅវត្តអង្គតាមិញ វិជ្ជមាន កូវីដ-១៩

អាជ្ញាធរ និងក្រុមគ្រូពេទ្យ កាលពីយប់ថ្ងៃទី៩ ខែសីហា ឆ្នាំ២០២១ បានចុះយកសំណាកព្រះសង្ឃ និងកូនសិស្សលោក ចំនួន២០០អង្គ-នាក់ នៅវត្តអង្គតាមិញ។ ជាលទ្ធផលបង្ហាញថា កូនសិស្សលោក២នាក់ មានវិជ្ជមានជំងឺ​កូវីដ-១៩។​ នេះបើតាមការឲ្យដឹងពីលោក ប៉ាង លីដា អភិបាលរង នៃគណៈអភិបាលខណ្ឌពោធិ៍សែនជ័យ នៅ​ព្រឹកថ្ងៃទី១០ ខែសីហា ឆ្នាំ២០២១។   

លោក ប៉ាង លីដា បានឲ្យដឹងបន្តថា ដោយមានការយកចិត្តទុកដាក់ ពីលោក ឃួង ស្រេង អភិបាលរាជធានីភ្នំពេញ និងលោក ហែម ដារិទ្ធិ អភិបាលខណ្ឌពោធិ៍សែនជ័យ គឺនៅវេលាម៉ោង១០ និង៣០នាទីយប់ ថ្ងៃទី៩ ខែសីហា ឆ្នាំ​២០​២១ ក្រុមការងាររដ្ឋបាលខណ្ឌពោធិ៍សែនជ័យ បានសហការជា​មួយ គ្រូពេទ្យស្ម័គ្រចិត្តយុវជនសម្តេចតេជោ (TYDA) ចុះយកសំណាកព្រះសង្ឃ និងកូនសិស្សលោក ចំនួន២០០អង្គ-នាក់។

អភិបាលរងខណ្ឌពោធិ៍សែនជ័យ បានបញ្ជាក់ថា ជាលទ្ធផលក្រុមគ្រូពេទ្យ​ បានរកឃើញកូនសិស្សលោក ២នាក់ មានវិជ្ជមានជំងឺកូវីដ-១៩ ហើយត្រូវបានក្រុមគ្រូពេទ្យ បញ្ជូនយកទៅព្យាបាលរួចហើយ៕