លោក ងួន សុបិន ផ្ទុះប្រតិកម្ម ក្រោយស្នាដៃចម្រៀងរបស់ខ្លួនត្រូវគេលួចចម្លង

ថ្មីៗនេះ តារាសម្តែង និងជាកវីនិពន្ធបទចម្រៀង លោក ងួន សុបិន បានបង្ហាញអារម្មណ៍ហួសចិត្ត និងខកចិត្តជាខ្លាំង បន្ទាប់ពីបទចម្រៀងមួយដែលលោកបាននិពន្ធតាំងពីជាច្រើនឆ្នាំមុន ត្រូវបានគេយកទៅកែសម្រួល និងច្រៀងឡើងវិញ ដោយពុំបានដាក់ឈ្មោះលោកជាអ្នកនិពន្ធ។

តាមរយៈការបង្ហោះសារលើបណ្តាញសង្គម លោក ងួន សុបិន បានលើកឡើងថា បទចម្រៀងមានចំណងជើង «អំណាចទឹកភ្នែក» គឺជាស្នាដៃដែលលោកបាននិពន្ធ និងធ្វើមេឡូឌីដោយផ្ទាល់តាំងពីយូរមកហើយ ប៉ុន្តែលោកមិននឹកស្មានថា នឹងមានអ្នកយកទៅកែសម្រួល និងផ្សព្វផ្សាយដោយមិនផ្តល់ការទទួលស្គាល់ដល់ម្ចាស់ស្នាដៃដើមនោះឡើយ។

លោករៀបរាប់ថា “លួចបទខ្ញុំទៅយូរយ៉ាងនេះ ហេតុអ្វីខ្ញុំមិនដឹង? ដើមហេតុមកពីអ្នកណា ចេញមុខមក។ ខ្ញុំជាអ្នកសរសេរ ខ្ញុំជាអ្នកធ្វើមេឡូឌី។ មុននេះ លោក ចេន សាចៃ បានច្រៀងជា Simple នៅស្ទូឌីយោរបស់អ្នកភ្លេងម្នាក់ ប៉ុន្តែឥឡូវហេតុអ្វីបានជាចេញមកបែបនេះ? មួយបទមិនថាទេ តែនេះច្រើនបទមកហើយ”។

លោកបានបញ្ជាក់ទៀតថា បទ «អំណាចទឹកភ្នែក» ត្រូវបានលោកនិពន្ធឡើងនៅថ្ងៃទី ១៥ ខែមិថុនា ឆ្នាំ ២០២១ វេលាម៉ោង ១១:៣៥ នាទី ហើយលោកក៏បានចោទសួរថា តើអ្នកដែលយកស្នាដៃរបស់លោកទៅប្រើប្រាស់នោះ ទទួលបានផលប្រយោជន៍ប៉ុន្មានពីការធ្វើបែបនេះ?

ក្រោយការបង្ហោះខាងលើ មានអ្នកគាំទ្រ និងអ្នកសិល្បៈមួយចំនួនបានចូលរួមបញ្ចេញមតិផងដែរ។ ក្នុងនោះ លោក សុខ ជំនោ បានបង្ហាញបទពិសោធន៍ស្រដៀងគ្នាថា លោកធ្លាប់ជួបបញ្ហាបែបនេះដូចគ្នា ប៉ុន្តែលោកមិនបានបញ្ចេញប្រតិកម្មខ្លាំងនោះទេ ព្រោះសាមីខ្លួនជាអ្នកដឹងច្បាស់បំផុតថា ដើមហេតុពិតប្រាកដកើតចេញពីណា៕ ដោយ៖ ចាន់រ៉ា