អាមេរិក បង្កកប្រាក់បម្រុងរបស់រដ្ឋាភិបាល អាហ្វហ្គានីស្ថាន ក្នុងធនាគាររបស់ខ្លួន ការពារកុំឲ្យក្រុមតាលីបង់ប្រើប្រាស់បាន

កាសែត Washington Post បានរាយការណ៍ថា រដ្ឋាភិបាលអាមេរិកបានបង្កកប្រាក់បម្រុងរបស់រដ្ឋាភិបាលអាហ្វហ្គានីស្ថាន ដែលមាននៅក្នុងគណនីធនាគារនៅអាមេរិក ដើម្បីការពារក្រុមតាលីបង់មិនឲ្យប្រើបាន ។

មន្រ្តីរដ្ឋបាលម្នាក់បានប្រាប់កាសែតនេះនៅក្នុងសេចក្តីថ្លែងការណ៍មួយថា “ទ្រព្យសម្បត្តិធនាគារកណ្តាលណាមួយ ដែលរដ្ឋាភិបាលអាហ្វហ្គានីស្ថានមាននៅសហរដ្ឋអាមេរិក នឹងមិនត្រូវបានផ្តល់ឲ្យតាលីបង់ឡើយ” ។

បើយោងតាមទិន្នន័យពីមូលនិធិរូបិយវត្ថុអន្តរជាតិបានឲ្យដឹងថា ធនាគារកណ្តាលអាហ្វហ្គានីស្ថានមានទ្រព្យសម្បត្តិបម្រុងចំនួន ៩.៤ ពាន់លានដុល្លារនៅចុងខែមេសា ។

គួរបញ្ជាក់ថា ក្រុមតាលីបង់បានចូលរដ្ឋធានីកាប៊ុលកាលពីថ្ងៃអាទិត្យ ជាទីក្រុងសំខាន់ចុងក្រោយដែលនៅតែស្ថិតក្រោមការគ្រប់គ្រងរបស់កងកម្លាំងរដ្ឋាភិបាលអាហ្វហ្គានីស្ថាន ខណៈការវាយលុកបានកើតឡើងយ៉ាងឆាប់រហ័ស ហើយក្រុមនេះក៏បានចូលទៅក្ដោបក្ដាប់វិមានរដ្ឋាភិបាលផងដែរ ។

ជាងនេះទៅទៀត ប្រធានាធិបតីរបស់ប្រទេសអាហ្វហ្គានីស្ថានលោក Ashraf Ghani បានរត់គេចពីទីក្រុងកាប៊ុល ដោយនិយាយថា គាត់ចង់បញ្ចៀសការបង្ហូរឈាម ៕

ប្រែសម្រួលដោយ ៖ ជីវ័ន្ត

ប្រភព ៖ CGTN

ចុចអាន ៖ អាមេរិក កំពុងព្យាយាមបង្កើនល្បឿនជម្លៀសមនុស្សចេញពីអាកាសយានដ្ឋានក្រុងកាប៊ុលដល់ ៩ ពាន់នាក់ក្នុងមួយថ្ងៃ