ផ្ទុះឆ្លងកូវីដជាចង្កោមសុទ្ធតែអ្នកចាក់វ៉ាក់សាំងក្នុងក្លឹបរាំរែកនៅ អាល្លឺម៉ង់

ប្រព័ន្ធផ្សព្វផ្សាយក្នុងស្រុកបានរាយការណ៍កាលពីថ្ងៃអង្គារថា មនុស្សយ៉ាងតិច ៦៣ នាក់បានធ្វើតេស្តវិជ្ជមានកូវីដ បន្ទាប់ពីចូលរួមពិធីរាំរែកនៅទីក្រុង Muenster ភាគខាងលិចប្រទេសអាល្លឺម៉ង់ ។

ទន្ទឹមនោះ អាជ្ញាធរមានការភ្ញាក់ផ្អើលយ៉ាងខ្លាំងចំពោះចំនួនករណីឆ្លងដ៏ខ្ពស់នេះ ដោយសារតែមនុស្សដែលត្រូវបានអនុញ្ញាតឲ្យចូលរួមពិធីនោះ សុទ្ធតែបានចាក់វ៉ាក់សាំង ឬជាសះស្បើយ ។

មនុស្សជិត ៣៨០ នាក់បាននៅក្លឹប អំឡុងពិធីជប់លៀង ហើយរហូតមកដល់ពេលនេះមាន ៦៣ នាក់ក្នុងចំណោមពួកគេបានធ្វើតេស្តវិជ្ជមានជំងឺកូវីដ ១៩ ខណៈពួកគេជាច្រើនបញ្ចេញរោគសញ្ញាតិចតួចប៉ុណ្ណោះ ។

គួររំឭកថា រដ្ឋ និងទីក្រុងមួយចំនួនរបស់អាល្លឺម៉ង់បានបន្ធូរបន្ថយការរឹតត្បិតមេរោគឆ្លងកាលពីខែមុន និងអនុញ្ញាតឲ្យភោជនីយដ្ឋាន ហាង កាហ្វេ និងក្លឹបរាំរែកបើកឡើងវិញក្នុងទីតាំងបិទជិត ប៉ុន្តែសម្រាប់តែមនុស្សដែលអាចបង្ហាញភស្តុតាងអំពីការចាក់វ៉ាក់សាំង ឬការជាសះស្បើយពីមេរោគប៉ុណ្ណោះ ។

ប៉ុន្តែអ្នករិះគន់និយាយថា ការបន្ថូរបន្ថយនេះកំពុងបង្កកំហុងឆ្គង ក្នុងចំណោមអ្នកដែលបានចាក់វ៉ាក់សាំង ព្រោះការសិក្សាថ្មីៗបង្ហាញថា អ្នកដែលទទួលការចាក់វ៉ាក់សាំងនៅតែអាចឆ្លងមេរោគ និងចម្លងវីរុសទៅអ្នកដទៃបានដដែរ ។

គួរបញ្ជាក់ថា គិតត្រឹមពេលនេះប្រទេសអាល្លឺម៉ង់បានកត់ត្រាករណីឆ្លងជំងឺកូវីដ ១៩ ជាង ៤ លានករណី និងមានអ្នកស្លាប់សរុបចំនួន ៩៣,៣១៩ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ខ្លាចមានអ្នកតោងដូចយន្តហោះអាមេរិក យោធា អាល្លឺម៉ង់ ជម្លៀសមនុស្សតែ ៧ នាក់ប៉ុណ្ណោះចេញពីក្រុងកាប៊ុល