Update៖ សមត្ថកិច្ចបញ្ជាក់ពីការស្លាប់របស់ស្ត្រីម្នាក់កាលពីម្សិលមិញនៅស្តាបេ ខេត្តព្រះសីហនុ

កាលពីវេលាម៉ោង៩និង៤០នាទីព្រឹក ថ្ងៃទី២៩ ខែតុលា ម្សិលមិញនេះ មានករណីភ្ញាក់ផ្អើលមួយដោយ​ប្រទះ​ឃើញ​​ស្ត្រីជនជាតិ​ចិនម្នាក់ដេកស្លាប់ក្នុងថ្លុកឈាមនៅក្នុងបន្ទប់ ចំណុច ស្តាបេ ស្ថិតក្នុងក្រុម១៣ ភូមិ០១ សង្កាត់លេខ០៣ ក្រុងព្រះសីហនុ ខេត្តព្រះសីហនុ។

របាយការណ៍សមត្ថកិច្ចបានឲ្យដឹងថា ជនរងគ្រោះមានឈ្មោះ WAN ROU ភេទ​ស្រី ជនជាតិចិន អាយុ ២២ឆ្នាំ ជាភ្ញៀវទើបចូលមក​ស្នាក់​នៅក្នុង​ខុនដូរកាលពីថ្ងៃទី២៨ ខែតុលា ម៉ោង១២និង៣០នាទីថ្ងៃត្រង់ ដោយស្នាក់នៅតែម្នាក់ឯង​ ជាន់ទី២២ បន្ទប់លេខ២២១១ កាន់លិខិតឆ្លងដែនលេខ : E 89947414 មាន​សុពលភាពថ្ងៃទី០៦ ខែមេសា ឆ្នាំ២០២៧។

សមត្ថកិច្ចបានបញ្ជាក់ថា តាមការពិនិត្យ និង​កោសល្យវិច័យរបស់មន្ត្រីជំនាញនៃស្នងការនគរបាលខេត្ត ព្រះសីហនុ បានសន្និដ្ឋានថា ជនរងគ្រោះស្លាប់ដោយសារករណីឃាតកម្ម ។ ក្រោយពីពិនិត្យរួច សាកសព ត្រូវបាន​ដឹក​យកទៅតម្កល់ទុក​នៅមន្ទីរពេទ្យបង្អែកខេត្តព្រះសីហនុ។

ម្ចាស់ខុនដូរឈ្មោះ CHEN BO ភេទ​ប្រុស អាយុ៤២ឆ្នាំ ជនជាតិចិន មុខរបរម្ចាស់ខុនដូរ ស្នាក់នៅជាន់ទី ២២ ត្រូវបានកម្លាំងសមត្ថកិច្ចនាំខ្លួនទៅសាកសួរនៅស្នងការនគរបាលខេត្តព្រះសីហនុ៕

​