អតីត​អភិបាល​ខេត្តកំពង់ឆ្នាំង លោក ឈួរ ច័ន្ទឌឿន ​ប្រឈម​នឹងវិធានការច្បាប់ពាក់ព័ន្ធ នឹង​ការ​ទន្ទ្រាន​ដីព្រៃលិច​ទឹក​ ២ ពាន់​ហិកតា​

រាជរដ្ឋាភិបាលកម្ពុជា បានប្រគល់ភារកិច្ចជូនអង្គភាពប្រឆាំងអំពើពុករលួយ (ACU) ធ្វើការ ស្រាវជ្រាវ និងចាត់វិធានការច្បាប់ចំពោះលោក ឈួរ ច័ន្ទឌឿន អតីតអភិបាលខេត្តកំពង់ឆ្នាំង ពាក់ព័ន្ធនឹងការទន្ទ្រានដីព្រៃលិចទឹកប្រមាណ ២ ពាន់ហិកតា។

អតីតអភិបាលខេត្តកំពង់ឆ្នាំង ដែលទើបចាកចេញមានព័ត៌មានថា បានកាប់បំផ្លាញយកដីព្រៃលិចទឹកប្រមាណជា២ពាន់ហិកតា យកទៅ កាន់កាប់ផ្ទាល់ខ្លួន។

លិខិតរបស់ទីស្ដីការគណៈរដ្ឋមន្ត្រី បង្ហាញរបាយការណ៍ផ្លូវការស្ដីពី លទ្ធផលនៃការចុះត្រួតពិនិត្យ និងចាត់វិធានការបង្ក្រាបការទន្ទ្រានដីរដ្ឋក្នុងដែនព្រៃលិចទឹក នៃតំបន់បឹងទន្លេសាប ស្ថិតក្នុងភូមិសាស្ដ្រខេត្តកំពង់ឆ្នាំង និងខេត្តកំពង់ធំ។

ក្នុងលិខិតដដែល រាជរដ្ឋាភិបាលបានសម្រេច ដកហូតដីរដ្ឋទំហំ ២.១០០,៦៦ហិកតា ដែលស្ថិតក្នុងដែនព្រៃលិចទឹកដូចមានកំណត់ក្នុងអនុក្រឹត្យ ចុះថ្ងៃទី២៩ ខែសីហា ឆ្នាំ២០១១ ដែលត្រូវបានទន្ទ្រានកាន់កាប់ដោយខុសច្បាប់ ស្ថិតនៅ​ឃុំច្រណូក និងឃុំដារ ស្រុកកំពង់លែង ខេត្តកំពង់ឆ្នាំង៕

លិខិតទីស្ដីការគណៈរដ្ឋមន្ដ្រីខាងក្រោម៖