រុស្ស៊ីនិងអាមេរិក ប៉ះទង្គិចគ្នាយ៉ាងក្តៅគគុកនៅ UN (មានវីដេអូ)

កាលពីថ្ងៃចន្ទទី៣១ខែមករា មានការប៉ះទង្គិចគ្នាយ៉ាងក្តៅគគុករវាងបេសកជនរុស្ស៊ី និងសហរដ្ឋអាមេរិក នៅក្រុមប្រឹក្សាសន្តិសុខអង្គការសហប្រជាជាតិ បន្ទាប់ពីសហរដ្ឋអាមេរិកបានអំពាវនាវឲ្យកោះប្រជុំ ​ដើម្បីពិភាក្សាអំពីការបង្កើនកងទ័ពរបស់ទីក្រុងមូស្គូនៅតាមព្រំដែន ជាប់ប្រទេសអ៊ុយក្រែន។

ឯកអគ្គរដ្ឋទូតសហរដ្ឋអាមេរិកលោកស្រី Linda Thomas-Greenfield បាននិយាយថា ការប្រមូលផ្តុំនោះ គឺជាការប្រមូលផ្តុំកងទ័ពធំបំផុតដែលអ៊ឺរ៉ុបមិនធ្លាប់ជួបប្រទះក្នុងរយៈពេលប៉ុន្មានទសវត្សរ៍មកនេះ។

ទោះបីជាយ៉ាងណាក៏ដោយ សមភាគី​រុស្ស៊ី​របស់​លោកស្រី ​បាន​ចោទ​អាមេរិក​ពី​បទ​ញុះញង់​ឲ្យ​មាន​កំហឹង និង​ការ​ជ្រៀតជ្រែកដែល​មិន​អាច​ទទួល​យក​បាន នៅ​ក្នុង​កិច្ចការ​រុស្ស៊ី។

ឯកអគ្គរដ្ឋទូតរុស្ស៊ីលោក Vasily Nebenzya បាននិយាយថា មិនមានភស្តុតាងណាមួយដែលបង្ហាញថារុស្ស៊ីកំពុងរៀបចំផែនការសកម្មភាពយោធាប្រឆាំងនឹងអ៊ុយក្រែននោះទេ ហើយការកសាងកងទ័ពរបស់ខ្លួនមិនត្រូវបានបញ្ជាក់ដោយអង្គការសហប្រជាជាតិឡើយ។

លោក​​និយាយ​ថា ជា​ញឹក​ញាប់ រុស្ស៊ី​បាន​ដាក់​ពង្រាយ​កងទ័ព​នៅ​លើ​ទឹក​ដី​របស់​ខ្លួន ហើយ​ថា​នេះ​មិន​មែន​ជា​រឿង​របស់​ក្រុង​វ៉ាស៊ីនតោន​ទេ។ រដ្ឋបាលលោក Biden កំពុង បង្កើនភាពតានតឹង និងវោហាសាស្ត្រ ហើយបង្កឲ្យមានការកើនឡើងនៃជម្លោះ។

លោកបន្ត “នេះមិនមែនគ្រាន់តែជាការជ្រៀតជ្រែកដែលមិនអាចទទួលយកបាននៅក្នុងកិច្ចការផ្ទៃក្នុងនៃរដ្ឋរបស់យើងប៉ុណ្ណោះទេ ប៉ុន្តែវាក៏ជាការប៉ុនប៉ងបំភាន់សហគមន៍អន្តរជាតិ អំពីស្ថានភាពពិតនៅក្នុងតំបន់ និងហេតុផលសម្រាប់ភាពតានតឹងពិភពលោកនាពេលបច្ចុប្បន្នផងដែរ”។

ទន្ទឹមនោះ លោកស្រី Thomas-Greenfield បានលើកឡើងថា សហរដ្ឋអាមេរិកនៅតែជឿថា មានដំណោះស្រាយការទូត ប៉ុន្តែបានព្រមានថា សហរដ្ឋអាមេរិកនឹងចាត់វិធានការយ៉ាងម៉ឺងម៉ាត់ ប្រសិនបើរុស្ស៊ីវាយចូលអ៊ុយក្រែន។

លោកស្រី​បន្ថែម​ថា “​នេះ​ជា​ការ​ចល័ត​ទ័ព​ធំ​បំផុត​នៅ​អឺរ៉ុប​ក្នុង​រយៈពេល​ជាច្រើន​ទសវត្សរ៍​ចុងក្រោយ​។ ហើយ​នៅពេល​យើង​និយាយនេះ រុស្ស៊ី​កំពុង​បញ្ជូន​កម្លាំង និង​អាវុធ​កាន់តែច្រើន​ទៅ​ចូលរួម​ជាមួយ​ពួកគេ​”។

លោកស្រីថែមទាំងអះអាងផងដែរថា ទីក្រុងមូស្គូគ្រោងនឹងបង្កើនកងកម្លាំងរបស់ខ្លួន ដែលដាក់ពង្រាយនៅក្នុងប្រទេសបេឡារុស្សនៅព្រំដែនភាគខាងជើងប្រទេសអ៊ុយក្រែន ដល់ទៅ៣០,០០០នាក់​ឯណោះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ អាមេរិក ថា រុស្ស៊ី មានសមត្ថភាពគ្រប់គ្រាន់វាយយកទឹកដី អ៊ុយក្រែន