ព័ត៌មានអន្ដរជាតិ

អាមេរិក ថា រុស្ស៊ី មានសមត្ថភាពគ្រប់គ្រាន់វាយយកទឹកដី អ៊ុយក្រែន

បានផុស

២ years មុន

នៅ

ថ្ងៃចន្ទ ៣១ មករា ២០២២

ដោយ

រដ្ឋមន្ត្រីការពារជាតិអាមេរិកលោក Lloyd Austin និយាយថា រុស្ស៊ីបានបង្កើនសមត្ថភាពយោធាគ្រប់គ្រាន់នៅតាមព្រំដែនរបស់ខ្លួនជាមួយអ៊ុយក្រែនដើម្បីវាយដណ្តើមយកទីក្រុង និងទឹកដីរបស់ប្រទេសនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Austin បានប្រាប់អ្នកសារព័ត៌មានកាលពីថ្ងៃអាទិត្យថា សហរដ្ឋអាមេរិកមិនជឿថា ប្រធានាធិបតីរុស្ស៊ីលោក Vladimir Putin បានធ្វើការសម្រេចចិត្តចុងក្រោយក្នុងការប្រើប្រាស់កងកម្លាំងនោះទេ ប៉ុន្តែគាត់ច្បាស់ណាស់ ឥឡូវនេះរុស្ស៊ីមានសមត្ថភាពគ្រប់គ្រាន់ ។

លោក Austin បានកត់សម្គាល់ថា លោក Putin មានជម្រើសច្រើន ។ លោកបាននិយាយថា ទាំងនេះរួមមាន “ការដណ្តើមយកទីក្រុង និងទឹកដីសំខាន់ៗ” និង “សកម្មភាពបង្ខិតបង្ខំ ឬសកម្មភាពនយោបាយបង្កហេតុ ដូចជាការទទួលស្គាល់ទឹកដីដែលបំបែកចេញជាដើម” ។

លោក Austin ក៏បានសង្កត់ធ្ងន់ពីសារៈសំខាន់នៃកិច្ចខិតខំប្រឹងប្រែងការទូតផងដែរ ។ លោកបាននិយាយថា “ជម្លោះមិនមែនជារឿងជៀសមិនរួចនោះទេ។ វានៅតែមានពេលវេលា និងកន្លែងសម្រាប់ការទូត” ។

ចំណែកប្រធានអគ្គសេនាធិការចម្រុះលោកឧត្តមសេនីយ៍ Mark Milley បាននិយាយថា ប្រទេសរុស្ស៊ីបានដាក់ពង្រាយទាហានជាង ១០០,០០០ នាក់នៅតាមព្រំដែនរបស់ខ្លួនជាមួយអ៊ុយក្រែន ។ លោកបាននិយាយថា នេះគឺជាទំហំ និងវិសាលភាពធំជាងអ្វីទាំងអស់ចាប់តាំងពីសង្គ្រាមត្រជាក់មក ។ លោកបានព្រមានថា សកម្មភាពយោអារបស់រុស្ស៊ីនឹងបណ្ដាលឲ្យមានចំនួនអ្នកស្លាប់ និងរបួសយ៉ាងច្រើន ។

ទន្ទឹមនឹងនេះ រដ្ឋបាលរបស់លោកប្រធានាធិបតី Joe Biden បានដាក់ការប្រុងជើងការនូវទាហានដែលមានមូលដ្ឋាននៅសហរដ្ឋអាមេរិកចំនួន ៨,៥០០ នាក់សម្រាប់ការដាក់ពង្រាយដែលអាចធ្វើទៅបានទៅកាន់អឺរ៉ុប ។

លោក Biden បានប្រាប់អ្នកយកព័ត៌មានថា លោកនឹងចល័តទាហានអាមេរិកទៅកាន់អឺរ៉ុបខាងកើត និងបណ្តាប្រទេសណាតូក្នុងរយៈពេលដ៏ខ្លីខាងមុខនេះ ប៉ុន្តែបាននិយាយថា ចំនួននេះនឹងមិនច្រើនទេ ៕