ទណ្ឌកម្មរបស់លោកខាងលិចលើ រុស្ស៊ី នឹងប៉ះពាលទីផ្សារពិភពលោក ជាពិសេស អាមេរិក

ឯកអគ្គរដ្ឋទូតរុស្ស៊ីប្រចាំនៅសហរដ្ឋអាមេរិកលោក Anatoly Antonov បាននិយាយថា ទណ្ឌកម្មរបស់លោកខាងលិចនឹងប៉ះពាល់ដល់ទីផ្សារពិភពលោក និងប៉ះពាល់ជាពិសេសដល់សុខុមាលភាពរបស់ប្រជាជនអាមេរិក ប៉ុន្តែនឹងមិនបង្ខំរុស្ស៊ីឲ្យផ្លាស់ប្តូរគោលនយោបាយការបរទេសរបស់ខ្លួននោះទេ ។

លោក Antonov បាននិយាយថា “គ្មានការងឿងឆ្ងល់ទេថា ទណ្ឌកម្មដែលបានដាក់ប្រឆាំងនឹងពួកយើងនឹងប៉ះពាល់យ៉ាងខ្លាំងដល់ទីផ្សារហិរញ្ញវត្ថុ និងថាមពលពិភពលោកនោះ ហើយប្រជាពលរដ្ឋរបស់អាមេរិកនឹងមានអារម្មណ៍ថាមានផលវិបាកពេញលេញនៃការកើនឡើងតម្លៃផលិតផលណាមួយ” ។

លោក Antonov បាននិយាយថា “ទណ្ឌកម្មប្រឆាំងនឹងរុស្ស៊ីនឹងមិនដោះស្រាយបញ្ហាណាមួយឡើយ ។ វាពិបាកក្នុងការស្រមៃថា នរណាម្នាក់នៅក្នុងទីក្រុងវ៉ាស៊ីនតោនកំពុងសង្ឃឹមថា ប្រទេសរុស្ស៊ីនឹងពិនិត្យឡើងវិញនូវគោលនយោបាយការបរទេសរបស់ខ្លួនក្រោមការគំរាមកំហែងនៃការដាក់ទណ្ឌកម្មនេះ” ។

លោក Antonov បាននិយាយថា សហរដ្ឋអាមេរិកមិនបានធ្វើអ្វីសោះក្នុងរយៈពេល ៧ ឆ្នាំចុងក្រោយនេះ ដើម្បីបញ្ចុះបញ្ចូលទីក្រុង Kiev ពីតម្រូវការក្នុងការអនុវត្តតាមកិច្ចព្រមព្រៀង Minsk ។

គួរបញ្ជាក់ថា កាលពីពេលថ្មីៗនេះសហរដ្ឋអាមេរិក​បាន​ប្រកាស​ដាក់​ទណ្ឌកម្ម​លើ​រុស្ស៊ី​ជា​លើក​ដំបូង ដោយសារ​ការ​កើនឡើង​បញ្ហាជុំវិញ​អ៊ុយក្រែន ។ ទណ្ឌកម្មនេះត្រូវបានដាក់លើធនាគារចំនួន ២ ដែលមានក្រុមហ៊ុនបុត្រសម្ព័ន្ធជាច្រើន ។

លើសពីនេះទៀត ជនជាតិអាមេរិកត្រូវបានហាមឃាត់មិនឲ្យធ្វើពាណិជ្ជកម្ម ការវិនិយោគ និងប្រតិបត្តិការហិរញ្ញវត្ថុជាមួយសាធារណរដ្ឋប្រជាមានិត Donetsk (DPR) និងសាធារណរដ្ឋប្រជាមានិត Lugansk (LPR) ដែលឯករាជ្យរបស់តំបន់ទាំងពីរនេះត្រូវបានទទួលស្គាល់ដោយប្រទេសរុស្ស៊ី ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប្រទេសអាស៊ីណាខ្លះប្រតិកម្មលោក ពូទីន ក្រោយទទួលស្គាល់ឯករាជ្យតំបន់ ២ នៅ អ៊ុយក្រែន?