អាជ្ញាធរខេត្តបាត់ដំបងកំពុងស្វែងរកដៃគូវិនិយោគបង្កើត Pub Street ​ដូចនៅខេត្តសៀមរាប

អាជ្ញាធរខេត្តបាត់ដំបងបានកំពុងស្វែងរកដៃគូវិនិយោគបង្កើតតំបន់ទេសចរណ៍មួយស្រដៀងនឹង Pub Street នៅខេត្តសៀមរាប ដើម្បីទាក់ទាញភ្ញៀវទេសចរជាតិ និងអន្តរជាតិទៅកម្សាន្តឱ្យបានកាន់តែច្រើនថែមទៀត។

គម្រោងបង្កើតតំបន់ទេសចរណ៍ស្រដៀងនឹងPub Street នៅខេត្តសៀមរាបនេះ ត្រូវបានលោក សុខ លូ អភិបាលខេត្តបាត់ដំបងលើកឡើង កាលពីថ្ងៃទី១៦ខែមីនាឆ្នាំ២០២២កន្លងទៅ។

បើតាមលោក សុខ លូ តំបន់ទេសចរណ៍ដែលស្រដៀងទៅនឹង Pub Street នៅខេត្តសៀមរាបនេះ គឺជាតំបន់ដែលភ្ញៀវទេសចរ អាចធ្វើដំណើរកម្សាន្ត មានភោជនីយដ្ឋាន ឬអាហារដ្ឋានជាដើម។

លោក សឿម ប៊ុនរិទ្ធ អភិបាលរងនិងជាអ្នកនាំពាក្យសាលាខេត្តបាត់ដំបង បានឱ្យដឹងនៅថ្ងៃទី១៦ឧសភានេះថា គម្រោងបង្កើតតំបន់ទេសចរណ៍ស្រដៀងនឹង Pub Street នៅខេត្តសៀមរាបនោះ រហូតមកដល់ពេលនេះ នៅមិនទាន់ចេញជារូបរាងនៅឡើយទេ ដោយសារនៅមិនទាន់មានអ្នកវិនិយោគ។

លោកសង្ឃឹមថា នឹងមានអ្នកវិនិយោគទាំងក្នុងស្រុក និងក្រៅស្រុកចាប់អារម្មណ៍ចូលរួមវិនិយោគគម្រោងនេះ នៅពេលខាងមុខ ដើម្បីប្រែក្លាយខេត្តបាត់ដំបងជាខេត្តមួយកាន់តែមានសក្កានុពល​លើវិស័យទេសចរណ៍​សម្រាប់ភ្ញៀវទេសចរជាតិ និងអន្តរជាតិ។

គួរបញ្ជាក់ថា Pub Street នៅខេត្តសៀមរាប ទទួលបានការគាំទ្រ និងពេញនិយកយ៉ាងខ្លាំងពីសំណាក់​បងប្អូនប្រជាពលរដ្ឋខ្មែរ និងបរទេស ក្នុងការដើរកម្សាន្ត ពិសាអាហារឆ្ងាញ់ៗនិងទិញសម្ភារផ្សេងៗ។

ប្រសិនបើខេត្តបាត់ដំបងបង្កើតតំបន់ទេសចរណ៍ស្រដៀងទៅនឹង Pub Street នៅខេត្តសៀមរាប ដូចការគ្រោងទុក នឹងជួយទាក់ទាញភ្ញៀវទេសចរទៅកម្សាន្តបានកាន់តែច្រើថែមទៀត ក្រៅពីតំបន់ទេសចរណ៍ផ្សេងៗ ពិសេសផ្ទះបុរាណ៕ សំអឿន