កីឡា

លោក កែវ រ៉េមី ស្ដាយជើងខ្លាំងរបស់ ITF កម្ពុជាមួយរូបនឹងមិនបានចូលរួមការប្រកួតអាស៊ី នៅប្រទេសម៉ុងហ្គោលី

បានផុស

៤ សប្តាហ៍ មុន

នៅ

ថ្ងៃពុធ ១០ មិថុនា ២០២៦

ដោយ

ប្រធានសហព័ន្ធកីឡាតេក្វាន់ដូ ITF កម្ពុជា លោក កែវ រ៉េមី ស្ដាយចំពោះការមិនបានចូលរួមរបស់ជើងខ្លាំងវ័យក្មេងគឺកីឡាករ សម្បត្តិ សុវណ្ណារ៉េន ក្នុងព្រឹត្តិការណ៍ប្រកួតជើងឯកអាស៊ី អំឡុងខែសីហា ឆ្នាំ២០២៦ នៅប្រទេសម៉ុងហ្គោលី ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កែវ រ៉េមី ប្រធានសហព័ន្ធ ITF

តាមរយៈការបង្ហោះនៅលើបណ្ដាញសង្គមហ្វេសបុករបស់លោក កែវ រ៉េមី បានបង្ហាញនូវការស្ដាយចំពោះការអាក់ខានមិនបានចេញទៅប្រកួតនៅព្រឹត្តិការណ៍ជើងឯកអាស៊ី អំឡុងខែសីហា ឆ្នាំ២០២៦ ខាងមុខនេះរបស់កីឡាករ សម្បត្តិ សុវណ្ណារ៉េន ដោយសារតែជាប់ភារកិច្ចប្រឡងបាក់ឌុប។

លោក កែវ រ៉េមី ប្រធានសហព័ន្ធបានបន្ថែមទៀតថា សម្បត្តិ សុវណ្ណារ៉េន ជាកីឡាករវ័យក្មេងដែលមានសមត្ថភាពខ្ពស់មិនថាបច្ចេកទេសនោះទេ សូម្បីវិន័យក្នុងការហ្វឹកហាត់ និងរស់នៅក៏ល្អផងដែរ។ រូបគេធ្លាប់ឈ្នះជើងខ្លាំងជាច្រើនមកហើយនៅការប្រកួតមុនៗដូចជាកាហ្សាក់ស្ដង់ កូរ៉េខាងជើង ឥណ្ឌា ជាដើម។ លោកពិតជាស្ដាយចំពោះកីឡាករដែលមានសមត្ថភាពអាចប្រជែងមេដាយជូនកម្ពុជារូបនេះជាខ្លាំង។

កីឡាករ សម្បត្តិ សុវណ្ណារ៉េន

បញ្ជាក់ដែរថា អំឡុងខែសីហា ឆ្នាំ២០២៦ ខាងមុខនេះសហព័ន្ធកីឡាតេក្វាន់ដូ ITF កម្ពុជានឹងទៅចូលរួមការប្រកួតជ្រើសរើសជើងឯកអាស៊ី នៅឯប្រទេសម៉ុងហ្គោលី។ រយៈពេលច្រើនខែមកហើយដែលសហព័ន្ធមួយនេះកំពុងសម្រុកហ្វឹកហាត់ដើម្បីត្រៀមខ្លួនឲ្យបានល្អក្នុងការឆ្ពោះទៅដណ្ដើមមេដាយជូនជាតិមាតុភូមិនៅព្រឹត្តិការណ៍កម្រិតអាស៊ីមួយនេះ៕