កុយ អេនណា ត្រូវបានក្រសួងទេសចរណ៍ជ្រើសជាតួអង្គសំខាន់ សម្រាប់ព្រឹត្តិការណ៍រត់ នៅថ្ងៃទី ២៨ មិថុនា ខាងមុខ

បវរកញ្ញាកម្ពុជា កញ្ញា កុយ អេនណា ត្រូវបានក្រសួងទេសចរណ៍ ជ្រើសរើសជាតួអង្គសំខាន់ សម្រាប់ព្រឹត្តិការណ៍រត់កម្សាន្ត ដែលគ្រោងនឹងរៀបចំឡើងនៅថ្ងៃទី២៨ ខែមិថុនា ឆ្នាំ២០២៦ ខាងមុខនេះ នៅលើកំពូលភ្នំឋានសួគ៌គិរីរម្យ (Kirirrom Paradise) ក្នុងគោលបំណងផ្សព្វផ្សាយទេសចរណ៍រដូវកាលបៃតង និងរត់ដើម្បីគាំទ្រកុមារកម្ពុជា។

ក្រសួងទេសចរណ៍ នៅរសៀលថ្ងៃទី១០ ខែមិថុនា ឆ្នាំ២០២៦ បានប្រកាសជាផ្លូវការអំពីការរៀបចំព្រឹត្តិការណ៍ «រត់ជាមួយអេនណា រត់ផ្សព្វផ្សាយរដូវកាលបៃតង រត់ដើម្បីកុមារកម្ពុជា» ដែលជាសកម្មភាពមួយរួមបញ្ចូលការលើកកម្ពស់វិស័យទេសចរណ៍បែបធម្មជាតិ (Eco-Tourism) នៅតំបន់គិរីរម្យ និងការងារសប្បុរសធម៌សម្រាប់កុមារកម្ពុជា។

តាមការបញ្ជាក់របស់ក្រសួងទេសចរណ៍ ប្រាក់ចំណេញពីការលក់សំបុត្រទាំងអស់ នឹងត្រូវយកទៅបរិច្ចាគដល់សាលារៀន កម្មវិធីសុខុមាលភាពកុមារ និងការអប់រំនៅតាមតំបន់ដាច់ស្រយាល។

ក្រៅពីគោលបំណងសប្បុរសធម៌ ព្រឹត្តិការណ៍នេះក៏មានបំណងជំរុញការធ្វើដំណើរកម្សាន្តក្នុងរដូវកាលបៃតង និងផ្សព្វផ្សាយសក្ដានុពលទេសចរណ៍ធម្មជាតិដ៏ស្រស់បំព្រងរបស់តំបន់ឋានសួគ៌គិរីរម្យផងដែរ។ អ្នកចូលរួមនឹងបានរីករាយជាមួយការរត់កម្សាន្តចម្ងាយ ៥គីឡូម៉ែត្រ លើផ្លូវចុះឡើងភ្នំក្នុងបរិយាកាសបៃតង និងខ្យល់អាកាសបរិសុទ្ធ ដែលផ្ដល់បទពិសោធថ្មីទាំងផ្នែកសុខភាពផ្លូវកាយ និងផ្លូវចិត្ត៕

🔗 ចុះឈ្មោះទិញសំបុត្រឥឡូវនេះតាមរយៈ https://www.bookme.plus/t/events/Kiriron_FunRun