អាមេរិក ប្ដេជ្ញាពង្រឹងសម្ព័ន្ធភាពសន្តិសុខនៅឥណ្ឌូប៉ាស៊ីហ្វិក ដើម្បីទប់ទល់ ចិន

ថ្លែងសុន្ទរកថានៅឯវេទិកាសន្តិសុខ Shangri-La Dialogue ក្នុងប្រទេសសិង្ហបុរីកាលពីថ្ងៃសៅរ៍ រដ្ឋមន្ត្រីការពារជាតិអាមេរិកលោក Lloyd Austin បានប្តេជ្ញាពង្រឹងសម្ព័ន្ធភាពសន្តិសុខ និងភាពជាដៃគូរបស់អាមេរិកនៅតំបន់ឥណ្ឌូប៉ាស៊ីហ្វិកក្នុងគោលបំណងប្រឆាំងនឹងវត្តមានយោធាដែលកំពុងកើនឡើងរបស់ប្រទេសចិន ។

ទន្ទឹមនោះលោក Austin បានចោទប្រកាន់ប្រទេសចិនថាបានទទួលយក “វិធីសាស្រ្តបង្ខិតបង្ខំ និងឈ្លានពានបន្ថែមទៀតចំពោះការទាមទារទឹកដីរបស់ខ្លួន ។ លោកបាននិយាយថា “យើងបានឃើញការកើនឡើងគួរឲ្យព្រួយបារម្ភនៃចំនួននៃការស្ទាក់ចាប់ពីលើអាកាសដែលមិនមានសុវត្ថិភាព និងការប្រឈមមុខគ្នានៅសមុទ្រដោយយន្តហោះ និងនាវារបស់ចិន” ។

លោក​បាន​សង្កត់ធ្ងន់​ថា “មាន​ការ​កើន​ឡើង​ជា​លំដាប់​នៃ​សកម្មភាព​យោធា​បង្កហេតុ និង​អស្ថិរភាព​នៅ​ជិត​កោះ​តៃវ៉ាន់ ។ គោលនយោបាយរបស់សហរដ្ឋអាមេរិក គឺមិនមានការផ្លាស់ប្តូរនោះទេ ។ យើងប្រឆាំងដាច់ខាតរាល់ការផ្លាស់ប្តូរឯកតោភាគីចំពោះស្ថានភាពបច្ចុប្បន្នពីភាគីណាមួយ ហើយយើងក៏មិនគាំទ្រឯករាជ្យភាពតៃវ៉ាន់ផងដែរ” ។

លោក Austin ក៏បានរំលឹកឡើងវិញនូវការប្តេជ្ញាចិត្តរបស់អាមេរិកដើម្បីជួយតៃវ៉ាន់ក្នុងការរក្សានូវសមត្ថភាពការពារខ្លួនឲ្យបានគ្រប់គ្រាន់ផងដែរ ។ លោកបានហៅសម្ព័ន្ធភាពសន្តិសុខអាមេរិក និងភាពជាដៃគូនៅក្នុងឥណ្ឌូប៉ាស៊ីហ្វិកថាជា “ប្រភពនៃស្ថិរភាពដ៏ជ្រាលជ្រៅ” ។

ជាចុងក្រោយលោកបញ្ជាក់ថា “ការទប់ស្កាត់រួមគ្នារបស់អាមេរិកនៅក្នុងតំបន់នឹងបន្តផ្តោតលើទំនាក់ទំនងរបស់យើងជាមួយសម្ព័ន្ធមិត្តរួមទាំងអូស្ត្រាលី និងជប៉ុនជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី បន្ថែមមីស៊ីលបាញ់ចេញពីនាវាមុជទឹកនៅសមុទ្រខ្មៅ ត្រៀមបាញ់ទៅ អ៊ុយក្រែន