ប្រមុខការទូតអាមេរិក រុស្ស៊ី និងចិន នឹងមកប្រជុំជាមួយរដ្ឋមន្ត្រីការបរទេសអាស៊ានដោយផ្ទាល់នៅភ្នំពេញ

លោក Antony Blinken រដ្ឋមន្ត្រីការបរទេសអាមេរិក លោក Wang Yi រដ្ឋមន្ត្រីការបរទេសចិន និងលោក Sergei Lavrov រដ្ឋមន្ត្រីការបរទេសរុស្ស៊ី នឹងមកចូលរួមកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធនានា នៅរាជធានីភ្នំពេញ។ នេះបើតាមលោក លុយ ដាវីត រដ្ឋលេខាធិការក្រសួងការបរទេស និងជាប្រធានលេខាធិការដ្ឋានរៀបចំកិច្ចប្រជុំរដ្ឋមន្ត្រីការបរទេសអាស៊ានដែលបញ្ជាក់ប្រាប់«កម្ពុជាថ្មី» នៅថ្ងៃសុក្រនេះ។

លោក លុយ ដាវីត បានឲ្យដឹងថា មកដល់ពេលនេះ មានប្រទេសជាសមាជិកអាស៊ាន និងប្រទេសជាដៃគូនានាចំនួន ៣១ប្រទេសហើយ បានចុះឈ្មោះមកចូលរួមសម្រាប់កិច្ចប្រជុំរដ្ឋមន្ត្រីការបរទេសអាស៊ានលើកទី៥៥ និងកិច្ចប្រជុំពាក់ព័ន្ធ ដោយផ្ទាល់នៅប្រទេសកម្ពុជា។ តែយ៉ាងណា រដ្ឋមន្រ្តីការបរទេសមីយ៉ាន់ម៉ាមិនត្រូវបានអញ្ជើញឲ្យចូលរួមកិច្ចប្រជុំនេះទេ។ ចំណែក ប្រទេសអ៊ុយក្រែនវិញ ក៏មិនត្រូវបានប្រធានអាស៊ាន​អញ្ជើញជាភ្ញៀវនោះដែរ។

ដោយឡែក សម្រាប់កិច្ចប្រជុំរដ្ឋមន្ត្រីការបរទេសអាស៊ាន-រុស្ស៊ី ដែលនឹងមានវត្តមានដោយផ្ទាល់របស់លោក Sergei Lavrov  គឺលោក លុយ ដាវីត បញ្ជាក់ថា គឺនឹងអាចពិភាក្សាអំពីវឌ្ឍនភាពទំនាក់ទំនង និងកិច្ចសហប្រតិបត្តិការរវាងរដ្ឋជាសមាជិកអាស៊ាន និងរុស្ស៊ី ហើយនឹងជជែកអំពីបញ្ហាប្រឈមជារួមនៅក្នុងតំបន់ និងពិភពលោក។  ជាមួយគ្នានេះ បញ្ហាជម្លោះរុស្ស៊ី និងអ៊ុយក្រែន ក៏អាចនឹងត្រូវលើកយកមកជជែកពិភាក្សានៅក្នុងកិច្ចប្រជុំនេះផងដែរ៕

ដោយ ៖ ធឿន វ៉ាន់សុង