អ៊ុយក្រែន កំពុងបង្កហេតុនៅរោងចក្រនុយក្លេអ៊ែរ ហើយទម្លាក់កំហុសឲ្យ រុស្ស៊ី ពេលមេ UN ទៅដល់

ក្រសួងការពារជាតិរុស្ស៊ីបាននិយាយថា កងកម្លាំងរបស់ខ្លួនមិនបានដាក់ពង្រាយអាវុធធុនធ្ងន់នៅរោងចក្រថាមពលនុយក្លេអ៊ែរ Zaporizhzhia នោះទេ ហើយបានចោទប្រកាន់ទៅទីក្រុងកៀវវិញថា កំពុងឆ្លៀតឱកាសបង្កហេតុនៅរោងចក្រមួយនេះ ជាពិសេសអំឡុងពេលការធ្វើដំណើររបស់លោក Antonio Guterres ទៅកាន់ប្រទេសអ៊ុយក្រែន ។

ក្រសួង​បាន​និយាយ​ក្នុង​សេចក្តី​ថ្លែងការណ៍​មួយ​ថា “កងទ័ពរុស្ស៊ីមិនមានអាវុធធុនធ្ងន់ឡើយ ទាំងនៅលើទឹកដីរបស់រោងចក្រ ក៏ដូចជានៅតំបន់ជុំវិញនោះ ។ យើងមាន​តែ​អង្គភាព​យាមកាមរោងចក្រនេះប៉ុណ្ណោះ” ។

ចំណែកពាក់ព័ន្ធនឹងការចោទប្រកាន់ថា កងកម្លាំងរុស្ស៊ីបាននឹងកំពុងបាញ់ផ្លោងលើទឹកដីទឹកដីរបស់រោងចក្រថាមពលនុយក្លេអ៊ែរ Zaporizhzhia, ក្រសួងបាននិយាយថា ទីក្រុងកៀវទៅវិញទេដែលកំពុងរៀបចំផែនការ “បង្កហេតុ” ជាពិសេសក្នុងអំឡុងពេលដំណើរទស្សនកិច្ចរបស់លោកលោក Antonio Guterres ប្រធានអង្គការសហប្រជាជាតិ (UN) ទៅកាន់ប្រទេសអ៊ុយក្រែន ។

ក្រសួងការពារជាតិរុស្ស៊ីបានឲ្យដឹងទៀតថា ក្រោយមករដ្ឋាភិបាលទីក្រុងកៀវនឹងបង្វែរស្ថានភាពនេះធ្វើជាលេសដើម្បីចោទប្រកាន់ និងទម្លាក់កំហុសលើរដ្ឋាភិបាលទីក្រុងមូស្គូថា បានបំផ្លិចបំផ្លាញ ក៏ដូចជាបង្កគ្រោះមហន្តរាយដល់រោងចក្រថាមពលនុយក្លេអ៊ែរមួយនេះ ។

ជាចុងក្រោយក្រសួងបញ្ជាក់ថា អ៊ុយក្រែនកំពុងដាក់ពង្រាយកងកម្លាំងនៅក្នុងតំបន់នេះ ហើយគ្រោងនឹងបើកការវាយឆ្មក់ដោយប្រើកាំភ្លើងធំលើរោងចក្រ Zaporizhzhia ពីទីក្រុង Nikopol នៅថ្ងៃសុក្រនេះ នៅពេលដែលលោក Guterres ចុះទៅទីក្រុងកំពង់ផែ Odesa ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ មេ UN ប្រាប់គោលបំណងទៅ អ៊ុយក្រែន លើកនេះ