​​ឃុំ​ពីរ​​នៅ​ស្រុក​ឯកភ្នំ រង​ផល​ប៉ះពាល់​ដំណាំស្រូវ​ ដោយ​សារជំនន់ទឹកភ្លៀង

មន្ត្រីជំនាញបានរកឃើញថា ផល​ដំណាំស្រូវប្រជាពលរដ្ឋនៅ​ស្រុក​ឯកភ្នំ​​ចំនួន ២ ឃុំ ទទួល​រងផលប៉ះពាល់​តិចតួច​ដោយសារ​ជំនន់ទឹកភ្លៀង។

លោក ហេង សិទ្ធ មន្រ្តី​ទទួលបន្ទុកផ្នែកស្ថិតិនៃមន្ទីរកសិកម្មខេត្តបានឲ្យកម្ពុជាថ្មីដឹងនៅរសៀលថ្ងៃទី០៨ខែកញ្ញានេះថា ផលប៉ះពាល់លិចលង់ពីជំនន់ទឹកភ្លៀងមានចំនួន ៣៨៦ ហិកតាលើឃុំចំនួន ២ គឺឃុំព្រែកនរិន្ទ និងឃុំពាមឯក ក្នុងនោះខូចចំនួន ១៧៥ហិកតា។

លោក​បញ្ជាក់ថា ការបើក​ទ្វារទឹក​ក្នុងស្រុកថ្មគោលទម្លាក់ទឹកនិងទ្វារទឹកផ្សេងៗទៀត ទើបបង្កឲ្យលិចលើឃុំ​ចំនួន ២ តែរហូតមកដល់ពេលនេះ មិនទាន់ឃើញមានរបាយការណ៍ណាមួយថាមានការលិចលង់បន្តទៀតនៅឡើយនោះទេ។

លោក ឌី ចាន់ ជាប្រជាកសិករនៅក្នុងឃុំព្រែកនរិន្ទបានឱ្យដឹងថា ដំណាំស្រូវរបស់លោកស្ទើរតែ ១០០ ភាគរយបាន​ខូចខាត​ទាំងស្រុងមិនអាចប្រមូលផលបាន ដោយសារស្រូវនៅខ្ចី។ ការ​ខូចខាតនេះធ្វើឲ្យ​ជីវភាពគ្រួសារធ្លាក់ចុះ តែបើទឹកឆាប់ស្រកអាចនឹងបានផលខ្លះមកវិញ។

ដោយឡែកកសិកររស់នៅឃុំព្រែកត្រប់ ស្រុកឯកភ្នំ គឺលោក រួម វីរុត ក៏កំពុងប្រឈមការខូចខាតផលដំណាំស្រូវ។ ដំណាំស្រូវរបស់លោករួមកសិករក្នុងភូមិព្រែកត្រប់ផ្សេងទៀតប្រមាណជាង ១០០ហិកតា បានលិចអស់ទាំងស្រុង ខណះស្រូវកំពុងតែនៅខ្ចីមិនអាចប្រមូលផលបានឡើយ។

បើទោះបីយ៉ាងណាមន្ត្រីជំនាញថា ផលដំណាំស្រូវក្នុងស្រុកឯកភ្នំ ទើប​តែមានផលប៉ះពាល់ត្រឹម ០១ ពាន់ហិកតា​ប៉ុណ្ណ្ណោះប្រហែលមិនដូចឆ្នាំកន្លងទៅនោះទេ។

មន្រ្តី​រូប​នេះ​បន្ត​ថា សម្រាប់ខេត្តបាត់ដំបងជំនន់ទឹកភ្លៀង​បង្ក​ឲ្យ​ការ​ខូចខាត​ខ្លាំងមិនធ្លាប់មានគឺក្នុងឆ្នាំ២០១៩ ដែលបានលិចលង់ ផលដំណាំស្រូវរបស់ប្រជាពលរដ្ឋរហូតដល់ ១០មុឺនហិកតាឯណោះ។ តែការខូចខាតកាលណោះក៏មានទំហំតិចតួចដែរ ដោយសារតែទឹកថមថយយ៉ាងឆាប់រហ័យផងដែរ។ ដោយឡែកក្នុងឆ្នាំនេះ បើឆ្លងផុតខែ ០៩នេះគឺផលដំណាំមិនត្រូវបានខូចខាតក្នុងទំហំធំបានឡើយ។

ពាក់ព័ន្ធផលដំណាំស្រូវដែលរងផលប៉ះពាល់ក្នុងស្រុកឯកភ្នំ លោក មុិល សុផល អភិបាលស្រុកឯកភ្នំ មិនបានឆ្លើយតបជាមួយកម្ពុជាថ្មីបន្ថែមថាយ៉ាងណានោះទេ ។ លោកបានលើកមើលសំនួរតាមប្រព័ន្ធតេលេក្រាម​តែ​មិនបានផ្តល់ចម្លើយយ៉ាងណារហូតមកដល់ម៉ោងនេះ៕

អត្ថបទ៖ សៅ សារិទ្ធ