កាណាដា ត្រៀមខ្លួនទប់ទល់ជាមួយ ព្យុះសង្ឃរាខ្លាំងបំផុតក្នុងប្រវត្តិសាស្រ្ត

ក្រុមមន្ត្រី បានជំរុញឲ្យប្រជាពលរដ្ឋនៅតាមបណ្តោយឆ្នេរសមុទ្រអាត្លង់ទិក របស់ប្រទេសកាណាដា ត្រូវត្រៀមខ្លួនសម្រាប់ផលប៉ះពាល់ ខណៈព្យុះសង្ឃរា Fiona កំពុងតម្រង់ទៅទិសខាងជើង បន្ទាប់ពីវាយប្រហារកោះ Bermuda។

មជ្ឈមណ្ឌលព្យុះសង្ឃរាកាណាដា (NHC) បានព្រមានថា ព្យុះ Fiona ដែលនឹងទៅដល់ដីគោកកាណាដា នៅព្រឹកថ្ងៃសៅរ៍ ទី២៤ខែកញ្ញានេះ គឺព្យុះខ្លាំងក្លាបំផុតក្នុងប្រវត្តិសាស្ត្រ។

ស្របពេលជាមួយគ្នានោះដែរ អាជ្ញាធរ​បាន​ព្រមាន​អំពីគ្រោះ​ទឹកជំនន់នៅ​តាម​តំបន់ឆ្នេរ ការ​ដាច់​ចរន្ត​អគ្គិសនី និង​លក្ខខណ្ឌ​បើកបរ​ដ៏​គ្រោះថ្នាក់។

មនុស្សចំនួន៨នាក់ ត្រូវបានសម្លាប់ដោយសារព្យុះនេះ នៅតំបន់ការ៉ាប៊ីន។

ភ្លៀងធ្លាក់ខ្លាំង និងខ្យល់បក់បោក បានវាយប្រហារកោះ Bermuda កាលពីព្រឹកថ្ងៃសុក្រ ដោយបង្ខំឲ្យសាលារៀន និងការិយាល័យនានាត្រូវបិទទ្វារ។

ព្យុះ​ Fiona ក៏បានបង្កការបំផ្លិចបំផ្លាញរួចហើយផងដែរនៅកោះ ព័រតូរីកូ និងសាធារណរដ្ឋដូមីនិកកាលពីដើមសប្តាហ៍នេះ ដោយមនុស្សជាច្រើននៅតែគ្មានអគ្គិសនី ឬទឹកប្រើប្រាស់។

NHC ព្យាករថា ព្យុះ Fiona នឹងនាំមកនូវជាមួយខ្យល់បក់ក្នុងល្បឿនអតិបរមា ២១៥ គីឡូម៉ែត្រក្នុងមួយម៉ោង។

មន្ត្រីកាណាដា បានចេញការព្រមានអំពីព្យុះដ៏កម្រសម្រាប់ខេត្តអាត្លង់ទិកដូចជា Nova Scotia, Prince Edward Island, Newfoundland និង New Brunswick ក៏ដូចជាផ្នែកខ្លះនៃខេត្ត Quebec ផងដែរ។

តំបន់ទាំងនេះអាចទទួលបានទឹកភ្លៀងរហូតដល់ ២៥សង់ទីម៉ែត្រ ដែលបង្កើនហានិភ័យនៃជំនន់ទឹកភ្លៀង៕

ប្រែសម្រួល៖ Vann Vann

ប្រភព៖ BBC

ចុចអាន៖ ព្យុះមួយទៀត នឹងវាយប្រហារប្រទេសជប៉ុន ចាប់ពីយប់នេះទៅ