នាយករដ្ឋមន្ត្រីកាណាដា៖ ជម្លោះអ៊ីរ៉ង់គឺជា «ការបរាជ័យនៃសណ្តាប់ធ្នាប់អន្តរជាតិ»

នាយករដ្ឋមន្ត្រីកាណាដា លោក Carney កាលពីថ្ងៃទី៣មីនា បានបរិហារ​សង្គ្រាម​​កំពុង​កើត​​ឡើង​នៅមជ្ឈិមបូព៌ា រវាងសហរដ្ឋអាមេរិក និងអ៊ីស្រាអែល វាយ​ប្រហារ​លើ​​អ៊ីរ៉ង់ ថាជា«ការបរាជ័យនៃសណ្តាប់ធ្នាប់អន្តរជាតិ» ហើយបានរិះគន់ប្រទេសទាំងពីរចំពោះការខកខានមិនបានពិគ្រោះយោបល់ជាមួយសម្ព័ន្ធមិត្តរបស់ពួកគេ។ នេះបើយោងតាមការចុះផ្សាយពីសារព័ត៌មាន thehill ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​នាយករដ្ឋមន្ត្រី​កាណាដាដែល​​​​មានជំហរ​ម៉ឺងម៉ាត់​ចំពោះអាមេរិក បាន​និយាយថា ថ្វីដ្បិតតែកាណាដាគាំទ្រការវាយប្រហាររបស់អាមេរិកលើអ៊ីរ៉ង់ ដោយសារតែកម្មវិធីនុយក្លេអ៊ែរអ៊ីរ៉ង់ គឺជាការគំរាមកំហែងធ្ងន់ធ្ងរបំផុតមួយចំពោះសន្តិភាព និងសន្តិសុខអន្តរជាតិក៏ដោយ​នោះ ប៉ុន្តែវាមិនមែនជាការគាំទ្រដោយគ្មានលក្ខខណ្ឌទេ។

​លោក Carney និយាយថា៖«​យើងមិននៅក្នុងសង្គ្រាមនោះទេ ហើយក៏មិនសុំអ្វីមកវិញដែរ។ នោះគ្រាន់តែជាជំហរច្បាស់លាស់របស់ពួកយើងប៉ុណ្ណោះ។ ដូច្នេះហើយ ភាគីជម្លោះទាំងអស់ ត្រូវចងភ្ជាប់ដោយច្បាប់អន្តរជាតិ»​។

នាយករដ្ឋមន្ត្រីកាណាដាបានបញ្ចាក់បន្ថែមទៀតថា ទោះបីជាក្រុមប្រឹក្សាសន្តិសុខអង្គការសហប្រជាជាតិ (UNSC) បានចេញសេចក្តីសម្រេចជាច្រើនដែលមានគោលបំណងទប់ស្កាត់កម្មវិធីនុយក្លេអ៊ែររបស់អ៊ីរ៉ង់ ក្នុងរយៈពេលប៉ុន្មានទសវត្សរ៍កន្លងមកនេះក៏ដោយ ទីក្រុងតេហេរ៉ង់នៅតែជា «ការគំរាមកំហែងនុយក្លេអ៊ែរ» ដដែល។

លោកបានសង្កត់ធ្ងន់ថា ឥឡូវនេះ សហរដ្ឋ​អាមេរិក និងអ៊ីស្រាអែលបានធ្វើសកម្មភាពដោយមិនពិគ្រោះជាមួយអង្គការសហប្រជាជាតិ ឬសម្ព័ន្ធមិត្តរបស់ខ្លួន រួមទាំងកាណាដាផងដែរ ដោយអំពាវនាវឲ្យមានការបន្ធូរបន្ថយជម្លោះយ៉ាងឆាប់រហ័ស។ កិច្ចសហប្រតិបត្តិការការទូតគឺចាំបាច់ណាស់ដើម្បីចៀសវាងជម្លោះធំជាងនេះ។ ជនស៊ីវិលស្លូតត្រង់ត្រូវការការការពារ ហើយគ្រប់ភាគីទាំងអស់ត្រូវតែប្តេជ្ញាចិត្តក្នុងការស្វែងរកកិច្ចព្រមព្រៀងយូរអង្វែងដើម្បីបញ្ចប់ការរីកសាយភាយអាវុធនុយក្លេអ៊ែរ។

ដោយឡែក អតីតរដ្ឋមន្ត្រីការបរទេស Lloyd Axworthy បានប្រៀបធៀបសេចក្តីថ្លែងការណ៍របស់លោក Carney ទៅនឹងការសម្រេចចិត្តឆ្នាំ ២០០៣ របស់កាណាដាដែលមិនគាំទ្រសង្គ្រាមដែលចាប់ផ្តើមដោយអាមេរិកនៅអ៊ីរ៉ាក់។

លោកថា ដូចជាសង្គ្រាមអ៊ីរ៉ាក់ដែរ ការវាយប្រហារលើអ៊ីរ៉ង់មិនអាចត្រូវបានរាប់ជាសុចរិតក្រោមធម្មនុញ្ញអង្គការសហប្រជាជាតិនោះទេ។ ជាពិសេស ករណីអ៊ីរ៉ង់មិនមែនជារឿងចម្លែកទេ។ នេះជាប្រទេសទី៧ដែលលោកត្រាំ បញ្ជាដោយឯកតោភាគីឲ្យប្រើប្រាស់កម្លាំងក្នុងអំឡុងពេលកាន់តំណែងរបស់លោក៕

អត្ថបទ៖ សាង ស្រីល័ក្ខ