កីឡា

បឹងកេត មានប្រៀបឡើងវគ្គផ្ដាច់ព្រ័ត្រពានសម្ដេចតេជោ ហ៊ុន សែន ខណៈវិសាខា និងភ្នំពេញក្រោន នៅស្រពិចស្រពិល

បានផុស

១ year មុន

នៅ

ថ្ងៃពុធ ១២ តុលា ២០២២

ដោយ

ការប្រកួតកាន់តែគួរឲ្យចាប់អារម្មណ៍ នៃពានរង្វាន់សម្ដេចអគ្គមហាសេនាបតីតេជោ ហ៊ុន សែន លើកទី ១៦ ឆ្នាំ ២០២២ ឈានដល់វគ្គពាក់កណ្ដាលផ្ដាច់ព្រ័ត្រ ជើងទី ២ ហើយ នាថ្ងៃទី ១២ ខែតុលា ដែលថ្ងៃនេះ ជាថ្ងៃកាត់សេចក្ដីរកក្រុមឡើងវគ្គផ្ដាច់ព្រ័ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មុនការប្រកួតមកដល់ គេមើលឃើញថា បឹងកេត មានប្រៀបឡើងវគ្គផ្ដាច់ព្រ័ត្រពានសម្ដេចតេជោ ហ៊ុន សែន ជាងអគ្គិសនីកម្ពុជា ខណៈវិសាខា និងភ្នំពេញក្រោន នៅមិនទាន់អាចនិយាយបានច្បាស់ថា ក្រុមណាមានប្រៀបជាង។

អគ្គិសនីកម្ពុជា Vs បឹងកេត ៖

អគ្គិសនីកម្ពុជា បើកទ្វារកីឡដ្ឋានអគ្គិសនីកម្ពុជា វេលាម៉ោង ៣ និង ៣០ នាទីរសៀលនេះ ទទួលស្វាគមន៍ក្លិបបឹងកេត។ ខណៈកាលពីជើងទី ១ បឹងកេត ធ្វើបានល្អខ្លាំង ដោយបានយកឈ្នះដល់ទៅ ៣-០ នៅកីឡដ្ឋានខេមបូឌាអ៊ែវ៉េ។ សម្រាប់ជើងទី ២ នេះ អគ្គិសនីកម្ពុជា ត្រូវធ្វើការធ្ងន់ខ្លាំង ដោយដាច់ខាតព្យាយាមរកគ្រាប់បាល់ឲ្យបាន ៤ គ្រាប់ឡើង ទើបអាចឡើងទៅវគ្គផ្ដាច់ព្រ័ត្រ ខណៈបឹងកេត ស្មើ គឺជាលទ្ធផលដែលគាប់ចិត្ត។

ក្នុងពានរង្វាន់សម្ដេចតេជោ ហ៊ុន សែន ក្រុមទាំងពីរធ្លាប់ជួបគ្នាតែ ២ ដងគត់ គិតទាំងជើងទី ១ ដោយលើកទី ១ កាលពីឆ្នាំ ២០១៧ អគ្គិសនិកម្ពុជា បានយកឈ្នះបឹងកេត ដោយបាល់ ១១ ម៉ែត្រកាត់សេចក្ដី ក្រោយប្រកួតស្មើគ្នា ១-១ ក្នុងវគ្គដណ្ដើមចំណាត់ថ្នាក់លេខ ៣។

វិសាខា Vs ភ្នំពេញក្រោន ៖

ចំពោះគូដែលគេរំពឹងថានឹងតានតឹងខ្លាំង គឺការជួបគ្នារវាង វិសាខា ជាមួយ ភ្នំពេញក្រោន នេះផ្ទាល់តែម្ដង ខណៈកាលពីជើងទី ១ ក្រុមទាំងពីរបញ្ចប់ទៅដោយ វិសាខា យកឈ្នះម្ចាស់ផ្ទះ ភ្នំពេញក្រោន ១-២ នៅកីឡដ្ឋានស្មាតអរអេសអិន។ ការប្រកួតល្ងាចនេះវិញ នឹងធ្វើឡើងនៅកីឡដ្ឋានព្រីសន៍ វេលាម៉ោង ៦ និង ៣០ នាទី ដោយការប្រកួតមានផ្សាយផ្ទាល់តាមរយៈទូរទស្សន៍ BTV News ផងដែរ។

វិសាខា ត្រូវការត្រឹមស្មើ នឹងអាចបានឡើងទៅវគ្គផ្ដាច់ព្រ័ត្រ ជាទីដែលគេប៉ុនប៉ងជាលើកទី ៣ ជាប់ៗគ្នា ក្នុងពានរង្វាន់ដ៏មានកិត្យានុពលមួយនេះ ដោយឡែកភ្នំពេញក្រោន ត្រូវការឈ្នះ ចាប់ពី ២ គ្រាប់ឡើង ដើម្បីឡើងទៅវគ្គផ្ដាច់ព្រ័ត្រជាលើកដំបូង ក្រោយខកខានតាំងពីឆ្នាំ ២០១០។

បញ្ជាក់ថា ការប្រកួតវគ្គនេះប្រសិនបើស្មើគ្នា នឹងត្រូវថែមម៉ោង ១៥ នាទី ២ ដង ប្រសិនបើស្មើទៀតនឹងបន្តទាត់បាល់ ១១ ម៉ែត្រកាត់សេចក្ដី។ គ្រាប់បាល់ ទាត់ចូលក្រៅដីពុំត្រូវបានរាប់បញ្ចូលនោះទេ៕

អត្ថបទ ៖ មន្នីរ័ត្ន