មេ ណាតូ ឆ្លើយបែបណារឿងគម្រោងដាក់ពង្រាយអាវុធនុយក្លេអ៊ែរ

អគ្គលេខាធិការអង្គការណាតូ លោក Jens Stoltenberg បាននិយាយកាលពីថ្ងៃសៅរ៍ថា អង្គការណាតូមិនមានគម្រោងផ្លាស់ប្តូរការដាក់ពង្រាយអាវុធនុយក្លេអ៊ែររបស់ខ្លួននោះទេ បន្ទាប់ពីហ្វាំងឡង់ និងស៊ុយអែត ចូលរួមជាមួយប្លុកនេះ ។

នៅពេលត្រូវបានសួរថាតើវាអាចទៅរួចដែរឬទេ ដែលអង្គការអង្គការណាតូនឹងដាក់ពង្រាយអាវុធនុយក្លេអ៊ែរនៅក្នុងប្រទេសស៊ុយអែត និងហ្វាំងឡង់ បន្ទាប់ពីប្រទេសទាំងនេះចូលរួមក្នុងសម្ព័ន្ធមិត្ត, លោក Stoltenberg បាននិយាយថា “អង្គការណាតូមិនមានគម្រោងផ្លាស់ប្តូរទីតាំង និងការដាក់ពង្រាយអាវុធនុយក្លេអ៊ែររបស់ខ្លួននោះទេ” ។

នៅថ្ងៃទី ១៨ ខែឧសភា ពោលរយៈពេល ៣ ខែ បន្ទាប់ពីរុស្ស៊ីបានចាប់ផ្តើមប្រតិបត្តិការយោធារបស់ខ្លួននៅក្នុងប្រទេសអ៊ុយក្រែន, ប្រទេសហ្វាំងឡង់ និងស៊ុយអែតបានដាក់ពាក្យសុំចូលជាសមាជិកអង្គការណាតូ ដោយបោះបង់ចោលអព្យាក្រឹតភាពរាប់ទសវត្សរ៍ ខណៈការចូលជាសមាជិករបស់ពួកគេត្រូវបានផ្តល់សច្ចាប័នរួចហើយដោយសមាជិកណាតូទាំងអស់ លើកលែងតែប្រទេសហុងគ្រី និងតួកគីប៉ុណ្ណោះ ។

នៅចុងខែតុលា ប្រព័ន្ធផ្សព្វផ្សាយបានរាយការណ៍ថា សេចក្តីព្រាងច្បាប់របស់ប្រទេសហ្វាំងឡង់ស្តីពីការចូលជាសមាជិកប្លុកនេះនឹងអនុញ្ញាតឲ្យមានការដាក់ពង្រាយអាវុធនុយក្លេអ៊ែរដោយបណ្តាប្រទេសណាតូនៅលើទឹកដីនៃប្រទេសហ្វាំងឡង់ ។

ដោយឡែកកាលពីថ្ងៃអង្គារ មេបញ្ជាការកំពូលនៃកងកម្លាំងប្រដាប់អាវុធស៊ុយអែត លោក Micael Byden បាននិយាយថា ទីក្រុង Stockholm ក៏គួរតែពិចារណាផងដែរថាតើត្រូវអនុញ្ញាតឲ្យដាក់ពង្រាយអាវុធនុយក្លេអ៊ែរ ឬមូលដ្ឋានរបស់អង្គការណាតូ នៅលើទឹកដីរបស់ខ្លួនដែរឬយ៉ាងណានោះ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik