ប្លែកមិនធ្លាប់មាន! ព្រឹត្តិការណ៍ដ៏កម្រប្រមូលផ្ដុំ វប្បធម៌ ម្ហូបអាហារ ប្រទេសសមាជិកអាស៊ាននៅទីតាំងតែមួយ

កម្ពុជានឹងធ្វើជាម្ចាស់ផ្ទះក្នុងកិច្ចប្រជុំកំពូលអាស៊ាន លើកទី ៤១ ដែលនេះជាលើកទី៣ ហើយប្រទេសកូនពៅសមាជិក​ទី១០ នេះបានធ្វើជាម្ចាស់ផ្ទះ។ ដើម្បីនាឱកាសដ៏វិសេសវិសាលនេះ សភាយុវជន បានប្រមូលផ្ដុំកម្លាំងរួមគ្នាផ្ដួចផ្ដើមរៀបចំនូវព្រឹត្តិការណ៍ដ៏ធំមួយ នោះគឺ «ភូមិអាស៊ាន» ។ 

តើអ្វីទៅជាភូមិអាស៊ាន? 

ភូមិអាស៊ានគឺជាព្រឹត្តិការណ៍ដែលប្រមូលផ្ដុំទៅដោយវប្បធម៌ចម្រុះ របស់បណ្តាប្រទេសសមាជិកអាស៊ាន ។ ព្រឹត្តិការណ៍ដ៏កម្រនេះ នឹងនាំអ្នកទាំងអស់គ្នាឱ្យទទួលបាននូវបទពិសោធន៍ប្លែកៗ និងមានឱកាសសិក្សាស្វែងយល់នូវសិល្បៈវប្បធម៌ នៃប្រទេសជាសមាជិកអាស៊ាន ។ ក្នុងនោះរួមមាន៖ ការស្លៀកសម្លៀកបំពាក់ប្រពៃណី, ការតាំងបង្ហាញវត្ថុអនុស្សាវរីយ៍​,​ ការដើរបង្ហាញម៉ូត,​ ការលេងល្បែងកម្សាន្ត ជាសេសនោះ​រួមទាំងមានការសម្តែងរបាំប្រពៃណី​ពីប្រទេសនានាដែលសមាជិកអាស៊ានផងដែរ។ 

លើសពីនេះទៅទៀត ព្រឹត្តិការណ៍ភូមិអាស៊ាន ក៏មាននូវការប្រគុំតន្រ្តីបែបសម័យសប្បាយៗ មានលក់ម្ហូបអាហារ​,​ ភេសជ្ជៈ​ និងបង្អែមយ៉ាងសម្បូរបែប​ រួមទាំងមានការតាំងពិព័រណ៌ផលិតផលផ្សេងៗពីប្រទេសសមាជិកអាស៊ាន។​ 

«ភូមិអាស៊ាន» នឹងប្រព្រឹត្តទៅរយៈពេលបីថ្ងៃ ចាប់ពីថ្ងៃទី​២៥​ ២៦​ ២៧​ ខែវិច្ចិកា​ ឆ្នាំ២០២២​ និងមានទីតាំងស្ថិតនៅសាលកវិទ្យាល័យជាតិគ្រប់គ្រង។ 

គួរឱ្យដឹងថា ព្រឹត្តិការណ៍ដ៏ពិសេសមួយនេះ ក្រោមកិច្ចសហការពីក្រសួងការបរទេស និងសហប្រតិបត្តិការអន្តរជាតិ ក្រសួងវប្បធម៌និងវិចិត្រសិល្បៈ ស.ស.យ.ក ខេត្តស្វាយរៀង និងស្ថានទូតទាំងរបស់សមាជិកអាស៊ានក្នុងប្រទេសកម្ពុជា៕