កម្ពុជា រំពឹងថា អតិផរណានឹងថយមកត្រឹមរង្វង់ ៣,២ ក្នុងឆ្នាំ ២០២៣

អត្រាអតិផរណា ក្នុងឆ្នាំ ២០២៣នេះ រំពឹងថា នឹងថមថយមកវិញក្នុងរង្វង់ ៣,២ភាគរយ ដោយសារការត្រឡប់ទៅ​រកប្រក្រតីភាពវិញ​ជាបណ្តើរៗនៃថ្លៃទំនិញ ជាពិសេសថ្លៃប្រេងអន្តរជាតិ។ នេះបើតាមការវាយតម្លៃរបស់អគ្គនាយកដ្ឋាន​គោលនយោបាយនៃក្រសួងសេដ្ឋកិច្ច។

ក្នុងន័យនេះ ថ្លៃម្ហូបអាហារ ត្រូវបានរំពឹងថា នឹងថមថយមកវិញក្នុងរង្វង់ ៣,៣ភាគរយ ខណៈដែលថ្លៃដឹកជញ្ជូននឹងធ្លាក់​ចុះប្រហែល -៣,៨ភាគរយ ដោយសារការធ្លាក់ថ្លៃប្រេងអន្តរជាតិក្នុងឆ្នាំ ២០២៣ ធៀបនឹងឆ្នាំ ២០២២ កន្លងទៅ។

អគ្គនាយកដ្ឋានគោលនយោបាយនៃក្រសួងសេដ្ឋកិច្ច បានឱ្យដឹងថា ការបន្តអនុវត្តវិធានការអន្តរាគមន៍​របស់​រាជរដ្ឋាភិបាល ក្នុងឆ្នាំ ២០២៣នេះ នឹងនៅតែបន្តដើរតួនាទីយ៉ាងសំខាន់ក្នុងការរក្សាលំនឹងសង្គម-សេដ្ឋកិច្ច និងទ្រទ្រង់ដល់កំណើនសេដ្ឋកិច្ចជារួម។

ទោះយ៉ាងនេះក្តី ទស្សនវិស័យសេដ្ឋកិច្ចកម្ពុជា បាននិងកំពុងជួបប្រទះនឹងហានិភ័យ និងភាពមិនប្រាកដប្រជា ដែល​បណ្តាល​មកពីកត្តាខាងក្រៅមួយចំនួន មានដូចជា៖ ការកើនឡើងនូវភាពតានតឹងភូមិសាស្រ្តនយោបាយតំបន់ និង​សកល, ការថមថយសេដ្ឋកិច្ចសកល, ការបន្តរឹតបន្តឹងយូរជាងការរំពឹងទុកនៃគោលនយោបាយរូបិយវត្ថុ ជាពិសេស​សហរដ្ឋអាមេរិក និងការកើនឡើងថ្លៃរូបិយប័ណ្ណដុល្លារអាមេរិក ដែលអាចប៉ះពាល់ដល់រំហូរទុនវិនិយោគ និងពាណិជ្ជកម្ម, ការកើនឡើងសម្ពាធបំណុល ជាពិសេសក្នុងប្រទេសមានសេដ្ឋកិច្ចកំពុងរីលូតលាស់, ការបែកខ្ញែកនៃសេដ្ឋកិច្ចសកល​ដែលនឹងប៉ះពាល់ដល់កិច្ចសហប្រតិបត្តិការ ការប្រែប្រួលអាកាសធាតុ និងគ្រោះធម្មជាតិ។

យោងតាមរបាយការណ៍របស់ធនាគារជាតិកម្ពុជា បានបង្ហាញថា នៅឆ្នាំ ២០២២ អតិផរណាបានកើនឡើងដល់ ៥,៣ភាគរយ ខ្ពស់ជាងឆ្នាំ ២០២១ ចំនួន ២,៩ភាគរយ ដែលជាចម្បងបណ្តាលមកពីកំណើនថ្លៃប្រេងឥន្ធនៈ និងម្ហូបអាហារ ក្រោមឥទ្ធិពលសង្រ្គាមរុស្ស៊ី-អ៊ុយក្រែន និងភាពរអាក់រអួលខ្សែច្រវាក់ផ្គត់ផ្គង់សកល ស្របពេល​ដែលតម្រូវការក្នុងស្រុកមានកំណើនជាលំដាប់៕