សេដ្ឋកិច្ច

កម្ពុជាព្យាករថា អត្រាអតិផរណាស្ថិតក្នុងរង្វង់ ២,៤%

បានផុស

១០ ខែ មុន

នៅ

ថ្ងៃសុក្រ ២៩ សីហា ២០២៥

ដោយ

ក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា អត្រាអតិផរណារបស់កម្ពុជាត្រូវបានព្យាករថា នឹងស្ថិតក្នុងរង្វង់ ២,៤% នៅឆ្នាំ ២០២៦-២០២៨ ស្របគ្នាទៅនឹងនិន្នាការរឹងមាំ នៃសកម្មភាពសេដ្ឋកិច្ច ខណៈដែលថ្លៃទំនិញអន្តរជាតិនៅតែបន្តមានប្រក្រតី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទេសាភិបាលធនាគារជាតិនៃកម្ពុជា លោកស្រីបណ្ឌិត ជា សិរី បានឱ្យដឹងថា បន្ទាប់ពីអតិផរណាបានថយចុះដល់កម្រិតទាបនៅឆ្នាំ ២០២៤ (ជាមធ្យម ០,៨%) អត្រាអតិផរណារួមបានហក់ឡើងនៅដើមឆ្នាំ ២០២៥ ដោយសារមូលដ្ឋានគណនាទាប និងកំណើនថ្លៃម្ហូបអាហារ។

នៅខែមករា ឆ្នាំ ២០២៥ អត្រាអតិផរណាបានកើនឡើង ៦% ប៉ុន្តែបានថយចុះជាបន្តបន្ទាប់មកវិញដល់ ១,៦% នៅខែមិថុនា ដែលបណ្ដាលមកពីការថយកំណើនថ្លៃម្ហូបអាហារ និងការធ្លាក់ថ្លៃប្រេងឥន្ធនៈ។

របាយការណ៍របស់ NBC បង្ហាញថា កំណើនថ្លៃក្រុមម្ហូបអាហារមានកម្រិតខ្ពស់នៅខែមករា ៧,៨% ដោយសារមូលដ្ឋានគណនាទាប និងការកើនឡើងតម្រូវការខ្ពស់ក្នុងអំឡុងពេលចូលឆ្នាំប្រពៃណីចិន។ ទោះយ៉ាងណា កាកើនឡើងសន្សឹមៗ នៃកម្រិតថ្លៃនាគ្រាដូចគ្នា ឆ្នាំមុន បានធ្វើឱ្យកំណើនថ្លៃក្រុមម្ហូបអាហារថយចុះ ជាបន្តបន្ទាប់មក ២,៥% នៅខែមិថុនា ឆ្នាំ ២០២៥។

អត្រាអតិផរណារបស់កម្ពុជា មានកម្រិត ៣,៥% នៅក្នុងឆមាសទី១ ឆ្នាំ ២០២៥ បណ្ដាលមកពីកំណើនថ្លៃម្ហូបអាហារ និងអតិផរណាស្នូល ខណៈថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈបានថយចុះ។

លោក ឃឹម ហ្វីណង់ អ្នកនាំពាក្យកសិកម្ម រុក្ខាប្រមាញ់ និងនេសាទ មានប្រសាសន៍ថា រាជរដ្ឋាភិបាលមានគោលនយោបាយគាំទ្រ ទាំងអ្នកផលិត និងអ្នកប្រើប្រាស់ ពោលគឺគោលនយោបាយសន្តិសុខស្បៀងគឺជារឿងសំខាន់ ដោយមិនឱ្យអត់ហូប និងមិនឱ្យទំនិញឡើងថ្លៃ។

លោកបានន្ថែមថា៖ «មិនថាកាលៈទេសៈណាទេ យើងដាច់ខាត មិនឱ្យអត់ហូប ហើយដាច់ខាតមិនឱ្យទំនិញចាំបាច់ឡើងថ្លៃទេ អញ្ចឹងយើងមើលអ្នកហូបមុនផង រួចហើយបានយើងទៅមើលថាតើយើងផលិតគ្រប់គ្រាន់សម្រាប់អ្នកហូបដែរឬទេ»។

ស្ថាប័នស្រាវជ្រាវសេដ្ឋកិច្ច AMRO ដែលមានមូលដ្ឋានៅប្រទេសសិង្ហបុរី បានព្យាករណ៍ថា សម្រាប់អត្រាអតិផរណារបស់កម្ពុជា មានទំនោរធ្លាក់ចុះ ប៉ុន្តែនៅតែមិនប្រាកដប្រជា ភាគច្រើនដោយសារការប្រែប្រួលតម្លៃម្ហូបអាហារ។

អតិផរណានៃសន្ទស្សន៍តម្លៃអ្នកប្រើប្រាស់ (CPI) ត្រូវបានគេរំពឹងថានឹងកើនឡើងដល់ ២,៥ភាគរយនៅឆ្នាំ ២០២៥ ដោយសារតែឥទ្ធិពលមូលដ្ឋាន មុនថយទៅដល់ ២,៣ភាគរយនៅឆ្នាំ ២០២៦ ដែលស្របតាមនិន្នាការមុនជំងឺរាតត្បាត។ ទោះជាយ៉ាងណាក៏ដោយ ដោយសារផ្លូវអតិផរណាមិនច្បាស់លាស់ និងការឆ្លងកាត់យ៉ាងលឿនពីតម្លៃទំនិញ ការកើនឡើងនៃតម្លៃទំនិញសកលអាចបង្កើនសម្ពាធអតិផរណា៕

អត្ថបទ៖ ឡេង ដេត