ព័ត៌មានអន្ដរជាតិ

ទំនុកចិត្ត CEO សិង្ហបុរីធ្លាក់ចុះ ជុំវិញបញ្ហាម៉ាក្រូសេដ្ឋកិច្ច

បានផុស

១ year មុន

នៅ

ថ្ងៃព្រហស្បតិ៍ ២០ មីនា ២០២៥

ដោយ

ទំនុកចិត្តក្នុងចំណោមបណ្ដានាយកប្រតិបត្តិ (CEO) នៃក្រុមហ៊ុនសិង្ហបុរីបានធ្លាក់ចុះ ជាចម្បងដោយសារតែអតិផរណា និងសម្ពាធតម្លៃ ដែលបន្តដាក់បន្ទុកលើទំនុកចិត្តអាជីវកម្ម។ នេះបើតាមកាសែត The Edge Singapore។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លទ្ធផលនៃការស្ទង់មតិស្ដីពីទស្សនវិស័យនាយកប្រតិបត្តិ របស់ក្រុមហ៊ុនប្រឹក្សាយោបល់ EY-Parthenon ដែលចេញផ្សាយកាលពីថ្ងៃអង្គារ បានបង្ហាញថា ទំនុកចិត្តរបស់នាយកប្រតិបត្តិទូទៅក្នុងចំណោមអ្នកឆ្លើយតបនៅសិង្ហបុរី បានធ្លាក់ចុះពី ៧២ ភាគរយ ក្នុងខែកញ្ញា ឆ្នាំ ២០២៤ មកនៅត្រឹម ៥៤ ភាគរយ។ ការស្ទង់មតិដដែល បានស្ទង់មតិទៅលើមេដឹកនាំអាជីវកម្មចំនួន ១ ២០០ នាក់ នៅទូទាំងពិភពលោក ដែលក្នុងនោះមាន ៤០ នាក់មកពីប្រទេសសិង្ហបុរី។

ការធ្លាក់ចុះភាគច្រើន បណ្ដាលមកពីបញ្ហាម៉ាក្រូសេដ្ឋកិច្ច ដូចជាក្តីបារម្ភអំពីតម្លៃ និងអតិផរណា ជាដើម។

លោក Andre Toh មន្រ្តីផ្នែកដឹកនាំការវាយតម្លៃ និងសេដ្ឋកិច្ចរបស់ក្រុមហ៊ុន EY ប្រចាំអាស៊ាន និងអាស៊ីប៉ាស៊ីហ្វិក បានថ្លែងថា៖ «ការចំណាយលើប្រតិបត្តិការសកលនៅតែខ្ពស់ ហើយនេះគឺកាន់តែធ្ងន់ធ្ងរទៅៗដោយភាពមិនប្រាកដប្រជានៃភូមិសាស្ត្រនយោបាយ និងម៉ាក្រូសេដ្ឋកិច្ចសកល ដែលនៅតែបន្តដាក់បន្ទុកលើទំនុកចិត្តមេដឹកនាំសាជីវកម្មរបស់សិង្ហបុរី»។

លើសពីនេះទៅទៀត លោក Toh បន្តថា៖ «ដោយសារសេដ្ឋកិច្ចបើកចំហ សិង្ហបុរីគឺងាយរងគ្រោះទៅនឹងវិបត្តិខ្សែច្រវ៉ាក់ផ្គត់ផ្គង់ និងការរំខានពាណិជ្ជកម្ម ដែលកាន់តែតានតឹងទៅៗក្នុងប៉ុន្មានខែថ្មីៗនេះ»។ លោកបន្ថែមថា ប្រសិនបើបញ្ហាទាំងអស់នេះមិនស្រកស្រាន្តទេនោះ នោះ CEO នឹងបន្តប្រុងប្រយ័ត្នលើការសម្រេចចិត្តផ្សេងៗរបស់ពួកគេ។

ទោះបីជាយ៉ាងណាក៏ដោយ ជាងពាក់កណ្ដាលនៃនាយកប្រតិបត្តិសិង្ហបុរីដែលឆ្លើយតបការស្ទង់មតិ នៅតែមានសុទិដ្ឋិនិយមចំពោះការកែប្រែគំរូអាជីវកម្មរបស់ខ្លួនដោយជោគជ័យសម្រាប់ពេលអនាគត។

ជាមួយគ្នានោះ ទំនុកចិត្តរបស់នាយកប្រតិបត្តិពិភពលោក បានកើនឡើងពី ៧០,៥ ភាគរយ ក្នុងខែកញ្ញា ឆ្នាំ ២០២៤ ដល់ ៧៣,៥ ភាគរយ ទោះបីជាការព្រួយបារម្ភអំពីការផ្លាស់ប្តូរបច្ចេកវិទ្យាឆាប់រហ័ស ការវិវត្តនៃរបៀបវារៈនិរន្តរភាព និងភាពតានតឹងភូមិសាស្ត្រនយោបាយនៅតែមានក៏ដោយ។ ជិតពាក់កណ្តាលនៃអ្នកឆ្លើយតបទូទាំងពិភពលោករំពឹងថា បញ្ហាប្រឈមទាំងនេះនឹងកាន់តែខ្លាំងទៅៗនៅឆ្នាំ ២០២៥ នេះ៕