សេតវិមានប្រាប់ ចិន កុំយកលេសការឈប់សម្រាករបស់លោកស្រី Tsai លើទឹកដី អាមេរិក ដើម្បីលុកលុយ តៃវ៉ាន់

ប្រធានាធិបតីតៃវ៉ាន់ លោកស្រី Tsai Ing-wen បានចុះចតយន្តហោះ និងឈប់សម្រាកនៅទីក្រុងញូវយ៉ក មុនបន្តដំណើរទស្សនៈកិច្ចរបស់លោកស្រីទៅកាន់បណ្តាប្រទេសនៅអាមេរិកកណ្តាល ខណៈចិនចាត់ទុកទង្វើនេះ ថាជាលេសរបស់តៃវ៉ាន់ ។

ពាក់ព័ន្ធនឹងបញ្ហានេះដែរ អ្នកនាំពាក្យក្រុមប្រឹក្សាសន្តិសុខជាតិរបស់សេតវិមាន លោក John Kirby បានលើកឡើងថា ទីក្រុងប៉េកាំងមិនគួរប្រើការឈប់សម្រាករបស់លោកស្រី Tsai Ing-wen លើទឹកដីអាមេរិក ជាលេសដើម្បីបង្កើនសកម្មភាពលុកលុយណាមួយនៅជុំវិញច្រកសមុទ្រតៃវ៉ាន់ឡើយ ។

ក្នុងអំឡុងសន្និសីទសារព័ត៌មានកាលពីថ្ងៃពុធ លោក Kirby បញ្ជាក់ទៀតថា លោកស្រី Tsai Ing-wen គ្រាន់តែហោះឆ្លងកាត់អាមេរិកប៉ុណ្ណោះ លោកស្រីមិនបានមកទស្សនកិច្ចប្រទេសរបស់យើងនោះទេ ហើយការចុះចតឈប់សម្រាកនេះ គឺជាលក្ខណៈឯកជន មិនមែនដំណើរផ្លូវការនោះទេ ។

ទន្ទឹមនោះ ការបញ្ជាក់របស់សេតវិមាន ក៏ដើម្បីបញ្ចៀសភាពតានតឹងបន្ថែមទៀតផងដែរ ដោយសារតែកន្លងមក ពោលកាលពីខែសីហា ឆ្នាំមុន នៅពេលដែលប្រធានសភាអាមេរិកលោកស្រី Nancy Pelosi បានធ្វើទស្សនកិច្ចនៅតៃវ៉ាន់ ប្រទេសចិនបានឆ្លើយតបដោយការធ្វើសមយុទ្ធយោធាទ្រង់ទ្រាយធំនៅជិតកោះតៃវ៉ាន់ ។

គួរបញ្ជាក់ថា លោកស្រី Tsai Ing-wen បានមកដល់អាកាសយានដ្ឋានអន្តរជាតិ John F. Kennedy កាលពីថ្ងៃពុធ ។ បន្ទាប់ពីចុះចតហើយ លោកស្រីបានអញ្ជើញទៅសណ្ឋាគារមួយកន្លែងនៅទីក្រុងញូវយ៉ក មុនបន្តដំណើរទស្សនកិច្ចនៅប្រទេសក្វាតេម៉ាឡា និងប្រទេសបេលី ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក ហ្សេលេនស្គី នឹងលក់ជ័យជម្នះរបស់ អ៊ុយក្រែន ទៅឲ្យលោកខាងលិច