ទីតាំង​ប្រកួតស៊ីហ្គេមនៅក្នុងខេត្តកែប ​រៀបចំ​សម្រេច​បាន ៩៩ ភាគរយ

នៅថ្ងៃទី ២២ ខែមេសាឆ្នាំ ២០២៣ អាជ្ញាធរខេត្តកែបបានអនុវត្តការងារកែលម្អទីតាំងឆ្នេរកែបសម្រេចបានប្រមាណ ៩៩ ភាគរយសម្រាប់​​ព្រឹត្តិការណ៍​ប្រកួត​ស៊ីហ្គេម​ នៅសល់តែការងារបំពាក់ភ្លើងបំភ្លឺតិចតួចបន្ថែមទៀតប៉ុណ្ណោះ។

ជាមួយគ្នានេះ អាជ្ញាធរក៏​បានត្រៀមសណ្ឋាគារពីរកន្លែងសម្រាប់កីឡាករ កីឡាការិនីសម្រាកក្នុងពេលចូលរួម​ប្រកួតនៅក្នុងខេត្តកែប​ផង​ដែរ។

លោក សោម ពិសិដ្ឋ អភិបាលខេត្តកែបបានអញ្ជើញចុះពិនិត្យវឌ្ឍនភាពនិងជំរុញពន្លឿនតារដ្ឋានអ៊ុតកៅស៊ី​ AC ​ផ្លូវលេខ ៣៣A នៅក្នុងក្រុងកែបកាលពីថ្ងៃទី ១៩ ខែមេសាកន្លង​ទៅ​នេះ ដើម្បីត្រៀមទទួលប្រភេទកីឡាដែលត្រូវប្រកួតនៅក្នុងខេត្ត​​កែប​​គឺ​កីឡាទ្រីយ៉ាថ្លុង ដែល​មានបីវិញ្ញាសារដូចជាហែលទឹកសមុទ្រ ជិះកង់ និងរត់ចម្ងាយ។

អាជ្ញាធរខេត្តកែបបានលើងឡើងថា ការអនុវត្តការងាររៀបចំកែលម្អហេដ្ឋារចនាសម្ព័ន្ធផ្សេងៗក៏​​កើតមានភាពចម្រូង​ចម្រាស់​មួយចំនួនផងដែរ ដែលមានក្រុមអាជីវករដែលលក់ដូរនៅតាមបណ្តោយឆ្នេរកែបខេត្តកែប​បង្ហាញការពេញចិត្តចំពោះវិធានការរបស់រដ្ឋបាលខេត្តកែប។

ចំពោះរដ្ឋបាលខេត្តកែបដែលមានបញ្ហាចម្រូងចម្រាស់ជាមួយក្រុមអាជីវករ ដែលលក់ដូរនៅតាមបណ្តោយឆ្នេរខេត្តកែបមិនមែនជាលើកទីមួយនោះទេ។ អាជ្ញាធរ​រំដោះឆ្នេរកែបចេញបានពីកណ្តាប់ដៃក្រុមអាជីវករមកវិញ គឺដើម្បីកុំឱ្យមានការប៉ះពាល់ទៅដល់អារម្មណ៍ភ្ញៀវទេសចរជាតិ និងអន្តរជាតិដែលបានមកលេងកម្សាន្តនៅតាមតំបន់ឆ្នេរខេត្តកែបនេះ៕

អត្ថបទ៖ សឹង រ៉ាត់