មេទាហានស៊ីឈ្នួល រុស្ស៊ី គំរាមដកទ័ពចេញពីទីក្រុង Bakhmut តែ អ៊ុយក្រែន​ ថាជាលេស

មេដឹកនាំក្រុមទាហានស៊ីឈ្នួលរុស្ស៊ី Wagner Group លោក Yevgeny Prigozhin បានគំរាមដកទ័ពចេញពីទីក្រុង Bakhmut នៅថ្ងៃទី១០ ខែឧសភានេះ បន្ទាប់ពីបានត្អូញត្អែរមិនមានគ្រាប់រំសេវគ្រប់គ្រាប់ដើម្បីធ្វើការប្រយុទ្ធក្នុងសមរភូមិភាគខាងកើតនៃប្រទេសអ៊ុយក្រែន ។

កន្លងមកក្រុមទាហានស៊ីឈ្នួល Wagner Group បានព្យាយាមវាយដណ្ដើមយកទីក្រុង Bakhmut អស់ជាច្រើនខែ ហើយថែមទាំងបានបាត់បង់អ្នកប្រយុទ្ធរាប់ពាន់នាក់ផងដែរ ដោយសារតែបញ្ហានេះហើយទើបលោក Prigozhin នឹងសម្រេចដកខ្លួនចេញពីទីក្រុងរ៉ែអំបិលមួយនេះនៅថ្ងៃទី១០ ខែឧសភា ពោលមួយថ្ងៃ ក្រោយទិវាជ័យជម្នះ ៩ ឧសភា របស់រុស្ស៊ីនៅក្នុងសង្គ្រាមលោកលើកទី២  ។

លោក Prigozhin បាននិយាយថា “យើងកំពុងស្រេកឃ្លានគ្រាប់រំសេវច្រើនជាងអ្វីដែលយើងស្នើសុំ ទើបយើងអាចសម្រេចបានគោលដៅលើសមរភូមិនៃទីក្រុង Bakhmut ប៉ុន្តែ​របស់​ដែល​យើង​ត្រូវ​ការ ​គឺ​អាច​រក​បាន​ដោយ​សេរី​នៅតាមឃ្លាំងផ្សេងៗទៅវិញ” ។

ការ​អះអាង​របស់​លោក​បាន​ជំរុញ​ឲ្យ​មាន​ការ​រំពឹង​ទុក​ថា ​ស្តុកគ្រាប់​របស់​រុស្ស៊ី​កំពុង​ធ្លាក់​ចុះ និងខ្វះខាត ។ ទោះយ៉ាងណាក៏ដោយ រដ្ឋមន្ត្រីការពារជាតិលោក Sergei Shoigu ធ្លាប់បានលើកឡើងថា រុស្ស៊ីមិនខ្វះអាវុធសម្រាប់ផ្ដល់ឲ្យទាហានក្នុងការប្រយុទ្ធនោះទេ ។

ពាក់ព័ន្ធនឹងបញ្ហានេះដែរ មន្ត្រី​អ៊ុយក្រែន​ក៏មាន​មន្ទិលសង្ស័យ​ចំពោះ​ការ​អះអាង​របស់មេដឹកនាំក្រុមទាហានស៊ីឈ្នួលរុស្ស៊ីរូបនេះផងដែរ ដោយសារតែវាអាចជាលេស ឬជាយុទ្ធសាស្ត្រប្រយុទ្ធណាមួយបំភាន់កងកម្លាំងរបស់អ៊ុយក្រែនប៉ុណ្ណោះ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Medvedev ៖ ក្រោយការវាយប្រហារលើវិមានក្រឹមឡាំងហើយ រុស្ស៊ី គ្មានជម្រើសអ្វីក្រៅពីកម្ចាត់លោក Zelensky ទេ