លោក Medvedev ៖ ក្រោយការវាយប្រហារលើវិមានក្រឹមឡាំងហើយ រុស្ស៊ី គ្មានជម្រើសអ្វីក្រៅពីកម្ចាត់លោក Zelensky ទេ

អតីតប្រធានាធិបតីរុស្ស៊ីលោក Dmitry Medvedev បាននិយាយនៅលើឆានែល Telegram របស់លោកថា ការវាយប្រហារដោយយន្តហោះដ្រូនមកលើលើវិមានក្រឹមឡាំងកាលពីពេលថ្មីៗនេះ ធ្វើឲ្យរុស្ស៊ីគ្មានជម្រើសអ្វីក្រៅពីកម្ចាត់រូបរាងកាយរបស់ប្រធានាធិបតីអ៊ុយក្រែនលោក Volodymry Zelensky និងក្រុមរបស់គាត់នោះទេ ។

លោក Medvedev បានលើកឡើងទៀតថា “បន្ទាប់ពីការវាយប្រហារភេរវកម្មនេះហើយ គ្មានជម្រើសណាផ្សេងក្រៅពីកម្ចាត់លោក Zelensky និងក្រុមរបស់គាត់ទេ ជាពិសេសការកម្ចាត់នេះមិនចាំបាច់ទាល់តែប្រធានាធិបតីអ៊ុយក្រែនរូបនេះ ចុះហត្ថលេខាសុំចុះចាញ់ឡើយ” ។

អនុប្រធានក្រុមប្រឹក្សាសន្តិសុខរូបនេះបញ្ជាក់ថា “ដូចដែលយើងធ្លាប់ដឹងហើយ ហ៊ីត្លែរ មិនបានចុះហត្ថលេខាសុំចុះចាញ់សង្គ្រាមនោះទេ ប៉ុន្តែវាតែងតែមានអ្នកជំនួសតំណែងរបស់គាត់” ។

ស្របពេលជាមួយគ្នានេះ វិមានក្រឹមឡាំងក៏បានចោទអាមេរិក និងអ៊ុយក្រែនផងដែរថា ប៉ុនប៉ងធ្វើឃាតលើលោកប្រធានាធិបតី វ្ល៉ាឌីមៀរ ពូទីន ខណៈប្រធានាធិបតីអ៊ុយក្រែនលោក Volodymyr Zelensky និងមន្ត្រីផ្សេងទៀត បានបដិសេធពីការជាប់ពាក់ព័ន្ធរបស់ទីក្រុងកៀវក្នុងការវាយប្រហារនេះ ។

ពាក់ព័ន្ធនឹងបញ្ហានេះដែរ វិមានក្រឹមឡាំងថែមទាំងបានចាត់ទុកសកម្មភាពនេះថាជា “អំពើភេរវកម្មដែលបានគ្រោងទុក” ហើយភាគីរុស្ស៊ីរក្សាសិទ្ធិក្នុងការចាត់វិធានការសងសឹកនៅកន្លែងណា និងនៅពេលណាដែលខ្លួនគិតថាសមស្រប ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ ក្រុមអ្នកវិភាគរបស់ អាមេរិក ថា រុស្ស៊ី ទំនងជារៀបចំការវាយប្រហារលើ​វិមានក្រឹមឡាំងដោយខ្លួនឯង