លោក Zelensky ថា រុស្ស៊ី នឹងចាញ់សង្គ្រាមដូចពួកណាស៊ី

ប្រធានាធិបតីអ៊ុយក្រែនលោក Volodymyr Zelensky បានអះអាង ក្នុងអំឡុងពេលថ្លែងសុន្ទរកថារំលឹកដល់ការបញ្ចប់សង្គ្រាមលោកលើកទី២ កាលពីថ្ងៃចន្ទថា កងកម្លាំងរុស្ស៊ីនឹងត្រូវកម្ចាត់នៅក្នុងទឹកដីអ៊ុយក្រែន ដូចពួកណាស៊ីអាល្លឺម៉ង់ត្រូវកម្ទេចក្នុងឆ្នាំ ១៩៤៥ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Zelensky បាននិយាយនៅក្នុងវីដេអូមួយនៅឯវិមានអនុស្សាវរីយ៍នៃសង្គ្រាមលោកលើកទី ២ ក្នុងទីក្រុងកៀវថា “អំពើអាក្រក់ចាស់ៗទាំងអស់ដែលរុស្ស៊ីកំពុងនាំយកមកវិញក្នុងសម័យទំនើបនេះ នឹងត្រូវបានកម្ចាត់ចោល ដូចដែលពួកណាស៊ីសត្រូវបានកម្ចាត់ចោលដូចគ្នា” ។

ប្រធានាធិបតីអ៊ុយក្រែនរូបនេះ បាននិយាយនៅក្នុងខួបនៃការចុះចាញ់របស់ពួកណាស៊ីអាល្លឺម៉ង់ចំពោះកងកម្លាំងសម្ព័ន្ធមិត្តកាលពីថ្ងៃទី៨ ខែឧសភា ឆ្នាំ១៩៤៥ និងជាទិវាជ័យជម្នះនៅអឺរ៉ុបថា “មិនខុសគ្នានូវអ្វីដែល​យើង​បាន​បំផ្លាញ​អំពើ​អាក្រក់​នៅពេលមុននោះទេ ឥឡូវនេះយើងក៏​កំពុង​បំផ្លាញ​អំពើ​អាក្រក់​ដូច​គ្នានេះផងដែរ​” ។

គួរបញ្ជាក់ថា សុន្ទរកថារបស់លោក Zelensky ដែលបានកត់ត្រានៅឯពិធីរំលឹកសង្រ្គាមលោកក្នុងទីក្រុងកៀវកើតមានឡើងមួយថ្ងៃប៉ុណ្ណោះ មុនទិវាជ័យជម្នះនៅទីក្រុងមូស្គូ ដែលក៏នឹងមានក្បួនដង្ហែរបស់កងទ័ពឆ្លងកាត់ទីលានក្រហម ជាមួយនឹងការពង្រឹងសន្តិសុខយ៉ាងខ្លាំងក្លាផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ The Moscow Times

ចុចអាន ៖ អតីតរដ្ឋមន្ត្រីការបរទេស អាមេរិក ព្យាករណ៍ពីកិច្ចចរចាសន្តិភាពនៅ អ៊ុយក្រែន